Tesla avtomobilləri sürücünün parklanma vərdişlərini öyrənəcək

    Tesla şirkəti Full Self-Driving (FSD) sisteminin avtomatik parklanma funksiyasını təkmilləşdirməyə hazırlaşır. Şirkətin baş direktoru Elon Musk bildirib ki, istifadəçilərin FSD-yə müdaxilə etməsinin əsas səbəblərindən biri məhz avtomobilin təyinat nöqtəsində düzgün parklanma yerini seçə bilməməsidir. Musk-ın sözlərinə görə, yaxın yeniləmələrdən sonra Tesla avtomobilləri sürücünün parklanma vərdişlərini öyrənə biləcək. Belə ki, sistem ev, iş yeri, məktəb və digər tez-tez ziyarət edilən məkanlarda istifadəçinin üstünlük verdiyi park yerlərini yadda saxlayacaq və növbəti dəfə həmin nöqtələrə avtomatik olaraq yönələcək.

    Bu yenilik sayəsində avtomobil yalnız təyinat nöqtəsinə çatmaqla kifayətlənməyəcək, həm də sürücünün seçdiyi konkret parklanma yerinə özü gedə biləcək. Bunun FSD sisteminin gündəlik istifadəsini daha rahat və etibarlı etməsi gözlənilir. Hələlik funksiyanın hansı tarixdə istifadəyə veriləcəyi və hansı modellərdə əlçatan olacağı açıqlanmayıb.