Tesla elektromobillərinə Starlink peyk antenası inteqrasiya edə bilər

    Technote.az “Mashable” platformasına istinadən bildirir ki, Tesla ABŞ və Avropada elektromobillər üçün olduqca maraqlı bir patent müraciəti edib. 4 dekabr tarixində təqdim olunan ABŞ patenti 2025/0368267, avtomobil damının xüsusi şəkildə dizayn edilərək radiofrekans siqnallarına şəffaf hala gətirilməsini təsvir edir.

    “Vehicle Roof Assembly with Integrated RF Transparency for Electronic Module Consolidation” adlı patent sənədində avtomobilin dam konstruksiyasına elektron modulların, xüsusilə də peyk rabitəsi üçün uyğun texnologiyaların inteqrasiyası nəzərdə tutulur. Bu isə Tesla-nın Starlink peyk internetini birbaşa elektromobillərinə yerləşdirməyi planlaşdırdığı ehtimallarını gücləndirib. Məlumata görə, patent ilk olaraq X platformasında istifadəçi Chansoo Byeon tərəfindən diqqətə çatdırılıb. Avropa Patent Ofisində yerləşdirilən sənəddə dam quruluşuna aid texniki sxemlər, material qatları və mümkün komponentlərin detallı izahı yer alır.

    Patentdə qeyd olunur ki, bu dam sistemi radio dalğalarının ötürülməsinə mane olmur və avtomobilə quraşdırılan elektron rabitə modullarının daha effektiv işləməsinə imkan yaradır. Bu texnologiya gələcəkdə mobil peyk interneti, real vaxt məlumat ötürülməsi və uzaq bölgələrdə əlaqə imkanlarının yaxşılaşdırılması kimi üstünlüklər təqdim edə bilər.

    Qeyd edək ki, patentin ABŞ versiyası hazırda brauzer üzərindən tam açıq olmasa da, Avropa Patent Ofisi vasitəsilə sənədin detalları ilə tanış olmaq mümkündür. Tesla isə hələlik bu patentin konkret hansı məhsullarda və nə vaxt tətbiq ediləcəyi ilə bağlı rəsmi açıqlama verməyib.