Tesla Robotaxi xidmətinin ilk sınaqlarında çoxlu sayda problemlər yaşanıb

     Bir müddət əvvəl Texas ştatının Ostin şəhərində başlanmış Tesla robotaksi xidmətinin ictimai sınaqları avtopilotun kifayət qədər yüksək sayda səhv hərəkətlər etdiyini göstərdi. Bu, sınağa şirkət tərəfindən xüsusi seçilmiş məhdud sayda blogerin cəlb olunmasına baxmayaraq baş verib. Hazırda yayımlanmış videolarda ən azı 11 kobud avtopilot xətası qeydə alınıb. Gerçək vəziyyətin daha pis olması ehtimalı isə şəhər rəhbərliyini və tənzimləyici qurumları Tesla-dan izahat tələb etməyə vadar edib. “Kifayət qədər az müddətdə bu qədər qeyri-sabit və pis idarəetmə ilə bağlı video ortaya çıxması dəhşətlidir. Birinci gündən bu qədər problemli yürüşlə bağlı videoların çıxacağını gözləmirdim” - deyə Karnegi Mellon Universitetinin kompüter mühəndisliyi üzrə professoru və avtonom texnologiyalar üzrə ekspert Philip Koopman bildirib.

     Qeyd edək ki, şəhərin məhdud bir ərazisində yollara çıxan robotaksilərin sayı cəmi 10-20 ədəd olub. Bu isə sınaqda iştirak edən Tesla avtoparkının demək olar ki, hamısında idarəetmə problemlərinin olduğunu göstərir. Videolar növbəti halları üzə çıxarıb: qarşı hərəkət zolağına çıxma, qəfil əyləcləmə, polis avtomobillərinin siqnallarına xaotik reaksiya, sürət həddinin aşılması, səkiyə çıxma və sərnişinin çoxzolaqlı yolun ortasında və ya kəsişmədə endirilməsi. Vəziyyəti vaxtında salonda sürücü yerinin yanında əyləşmiş köməkçilər (operatorlar) nəzarət altında saxlayıblar. Onlar ya avtopilota növbəti addımı göstəriblər, ya da fövqəladə dayanmaya (yol kənarına çıxış) əmr veriblər. Ostin şəhərinin nümayəndəsi bildirib ki, rəsmi şəxslər Tesla ilə bağlı problemlərdən sosial şəbəkələrdəki paylaşımlar vasitəsilə xəbər tutublar. Buna görə də onlar potensial təhlükəyə cavab verir və problemin aradan qaldırılması üçün şirkətlə əməkdaşlıq edirlər.

     Tənzimləyici qurum olan ABŞ Milli Yol Hərəkəti Təhlükəsizliyi İdarəsi (NHTSA) də Tesla-dan müvafiq məlumat və rəy tələb edib. Şirkətin baş icraçı direktoru Elon Musk-ın dəfələrlə qeyd etdiyi kimi, Tesla-nın maliyyə gələcəyi avtonom idarəetmə texnologiyası ilə sıx bağlıdır. Bu məsələ xüsusilə indi daha da vacibdir, çünki Tesla-nın satışları azalır. Musk bildirib ki, Tesla bu xidməti bu ilin sonlarında ABŞ-ın digər şəhərlərində də istifadəyə verəcək və proqnozlaşdırıb ki, 2026-cı ilin ikinci yarısına qədər milyonlarla Tesla tamamilə avtonom rejimdə işləyəcək. Lakin robotaksilərin ilk istismar günləri göstərdi ki, Tesla üçün tam avtonom idarəetmə yaxın perspektivdə reallaşacaq bir məsələ deyil. General Motors şirkətinə məxsus Cruise-in analoji xidməti, piyada ilə baş verən və detalları gizlədilməyə çalışılan bir hadisədən sonra bağlanmışdı. ABŞ-da hazırda bu sahədə uğurlu irəliləyiş göstərən yeganə robotaksi xidməti Alphabet-ə (Google) məxsus Waymo-dur. O, artıq ABŞ-ın bir neçə şəhərində fəaliyyət göstərir və vətəndaşlardan müsbət rəylər alıb.