Tesla üçün Apple CarPlay dəstəyinin təqdimatı yenidən təxirə salınıb

    Technote.az “Engadget” platformasına istinadən bildirir ki, Tesla avtomobillərində Apple CarPlay dəstəyinin təqdimatı yenidən təxirə salınıb. Bloomberg jurnalisti Mark Gurman “Power On” bülletenində bildirib ki, gecikmənin əsas səbəbi iOS 26-nın gözləniləndən daha zəif yayılması və tətbiq uyğunluğu problemləridir.

    Məlumata görə, Tesla ilə Apple arasında CarPlay inteqrasiyası ilə bağlı testlər ötən ilin noyabrında aparılıb və ilkin iddialar 2025-ci ilin sonuna qədər istifadəyə veriləcəyini göstərirdi. Lakin əsas problem Apple Maps ilə Tesla-nın öz daxili naviqasiya sisteminin uyğunlaşdırılması olub. Bu sistem eyni zamanda şirkətin avtonom idarəetmə funksiyalarını da dəstəkləyir.

     Problemi aradan qaldırmaq üçün Apple iOS 26 yeniləməsini təqdim edib. Yeniləmə hər iki naviqasiya sisteminin, xüsusilə sürücü avtopilot və ya digər avtonom rejimlərdən istifadə edərkən daha sinxron işləməsini hədəfləyir. Buna baxmayaraq, Tesla rəhbərliyi iOS 26-nın kifayət qədər istifadəçi tərəfindən quraşdırılmamasını risk hesab edir və bu səbəbdən CarPlay inteqrasiyasını hələlik gözləmədə saxlayır.