Toyota 10 ildən sonra Scion brendini kiçik yük maşını ilə qaytarır

    “Toyota” 2016-cı ildə dayandırdığı “Scion” brendini fərqli məqsədlə geri qaytarır. “Scion by Toyota” artıq gənclərə yönələn hetçbek markası olmayacaq. Brend yeni nəqliyyat ideyalarını sınaqdan keçirmək üçün işlədiləcək. İlk layihə ABŞ-nin İndiana ştatında istehsal olunacaq yığcam “KEI-01” yük maşınıdır. İstehsalın 2027-ci ilin ikinci yarısında başlanması planlaşdırılır.

    ABŞ-də kiçik ölçülü “kei” avtomobillərinə maraq son illərdə artıb. 2020-ci ildən bəri ölkəyə 30000-dən çox işlənmiş “kei” yük maşını gətirilib. İllik idxal artıq təxminən 7500 ədədə çatır. “Toyota” yerli istehsal edəcəyi modellə bu tələbi yoxlamaq istəyir. “Scion” adı iş, açıq hava və fərdiləşdirmə üçün hazırlanan xüsusi layihələrin sınağında işlədiləcək.

    “KEI-01” modelində 660 kubsantimetr həcmli, 3 silindrli benzin mühərriki olacaq. Avtomobil avtomatik və pilləsiz sürətlər qutusu ilə işləyəcək. Federal aşağı sürətli nəqliyyat qaydalarına görə maksimal sürət təxminən 40 km/saatla məhdudlaşdırılacaq. Modelin uzunluğu təxminən 3,4 metr, eni 1,5 metrdən azdır. Böyük pikapla müqayisədə təxminən 2 dəfə az yer tutduğuna görə dar küçələrdə, fermalarda və kampus yollarında rahat hərəkət edə biləcək.

    Yük yerinin hər 3 tərəfi tam açılır, avtomobil təxminən 272 kq yük daşıya bilir. Kiçik qoşquları və otbiçənləri dartmaq da olar. Ehtiyac olduqda 4 təkərdən çəkiş sistemi işə düşür. Sürücü sistemi düymə ilə kilidləyə bilər ki, bu da sürüşkən səthlərdə hərəkəti asanlaşdırır. Qapalı salonda isitmə və kondisioner var. Oturacaqlar arxaya əyilir, alətlər üçün ayrıca saxlama yeri ayrılıb. Sükan sağ tərəfdədir.

    “Toyota” yerli istehsalı qurmaq üçün Prinston zavoduna 34 milyon dollar (təxminən 57,8 milyon manat) yatıracaq. Bununla təxminən 50 iş yeri açılacaq. Qiymət hələ açıqlanmayıb. Yaponiyadan gətirilən işlənmiş “kei” yük maşınları adətən 6000-12000 dollar (təxminən 10200-20400 manat) aralığında satılır. İlk mərhələdə model kampuslar, fermer təsərrüfatları, bələdiyyələr və çatdırılma şirkətlərinə yönələcək. Tələb yüksək olsa, sonradan adi alıcılar üçün də satışa çıxa bilər.

    “Scion”un geri qayıtması ilə yanaşı, 2 konsept də göstərilib. “SxS Concept” 300 at gücündən çox güc verən hibrid turbo sistemli yolsuzluq avtomobilidir. Modul quruluşlu “BKE Concept” isə yığcam şəxsi nəqliyyat ideyasını göstərir. Hər iki layihə markanın iş və açıq hava nəqliyyatı üçün yeni həlləri sınaqdan keçirəcəyinə işarə edir.