Uber mobil tətbiqsiz taksi sifarişi üçün kiosklar quraşdırır

    Technote.az “Engadget” platformasına istinadən bildirir ki, Uber mobil tətbiqdən istifadə etmədən taksi sifarişini mümkün edən yeni kiosklarını istifadəyə təqdim edir. Şirkət bu xidməti əsasən xarici turistlər və internet paketi olmayan səyahətçilər üçün nəzərdə tutsa da, telefonun enerjisi bitdikdə də xilas yolu ola bilər. Kiosklarda sərnişin gedəcəyi ünvanı və seçdiyi xidmət növünü daxil edir və sifarişlə bağlı məlumatların yer aldığı çap olunmuş qəbz alır. İlk kiosk Nyu-Yorkdakı LaGuardia Hava Limanının C terminalında istifadəyə veriləcək. Uber yaxın aylarda bu sistemi digər hava limanlarında, otellərdə və limanlarda da quraşdırmağı planlaşdırır.

    Xüsusən hava limanlarında bu addım, Uber-i ənənəvi taksilərin daha birbaşa rəqibinə çevirir. Tətbiqə ehtiyac qalmadığından, kiosk bir növ dispetçer rolunu oynayır və sərnişin gözləmə müddəti və ya qiymətə görə Uber və sarı taksi arasında seçim edə bilir.

    Uber bundan əvvəl də LaGuardia-dan başlayan xüsusi shuttle avtobus xidmətini tətbiq etmişdi. 2024-cü ilin oktyabrında hava limanı ilə Manhattan nəqliyyat mərkəzləri arasında 18 dollarlıq marşrut yaradıldı, 2025-ci ilin martında isə bu xidmət JFK Hava Limanına genişləndirildi. İndi şirkət shuttle xidmətini Newark Liberty Beynəlxalq Hava Limanına da gətirdiyini açıqlayıb. Bununla da Nyu-Yorkdakı bütün əsas hava limanları artıq Uber-in shuttle marşrutlarına qoşulub.