Waymo "blackout" sonrası robotaksi sistemini yeniləyir

    Technote.az “TechCrunch” platformasına istinadən bildirir ki, Waymo San-Fransiskoda baş verən genişmiqyaslı elektrik kəsintisi zamanı robotaksilərinin niyə yol ayrıcılarında ilişib qaldığını açıqlayıb. Şirkət bildirib ki, bu vəziyyətin təkrarlanmaması üçün yaxın vaxtlarda proqram təminatı yenilənəcək.

    Keçən həftəsonu San Francisco şəhərində elektrik enerjisinin kəsilməsi nəticəsində bir çox svetofor fəaliyyətini dayandırıb. Waymo-nun sözlərinə görə, robotaksilər sönmüş svetoforları dördtərəfli “STOP” kimi qəbul edir ki, bu da insanların davranış qaydalarına uyğundur və normal şəraitdə problem yaratmamalıdır. Lakin bu dəfə fərqli vəziyyət yaranıb. Şirkətin açıqlamasına əsasən, bir çox avtomobil eyni vaxtda “təsdiq sorğusu” göndərərək Waymo-nun flot idarəetmə komandasından vəziyyətin düzgün qiymətləndirildiyini təsdiqləməsini istəyib. Elektrik kəsintisinin geniş ərazini əhatə etməsi bu sorğuların kütləvi şəkildə artmasına səbəb olub və nəticədə videolarda görünən tıxaclar formalaşıb.

    Waymo qeyd edir ki, bu təsdiqləmə mexanizmi ilkin mərhələdə təhlükəsizliyi maksimum səviyyədə təmin etmək məqsədilə yaradılıb. Lakin hazırkı miqyas nəzərə alınaraq sistem təkmilləşdirilir. Yeni proqram yeniləməsi avtopilot sisteminə regional elektrik kəsintiləri barədə daha geniş kontekst təqdim edəcək və avtomobillərin bu cür vəziyyətlərdə daha qərarlı hərəkət etməsinə imkan verəcək. Şirkət əlavə olaraq bildirib ki, tənqidlərə baxmayaraq, robotaksilər həmin gün 7 000-dən çox işləməyən svetofordan problemsiz keçə bilib. Bununla yanaşı, Waymo fövqəladə hallar üzrə daxili protokollarını da yenidən nəzərdən keçirəcəyini açıqlayıb.