Waymo Dallasda robotaksi xidmətini genişləndirdi

    Waymo ABŞ-nin Dallas şəhərində robotaksi xidmətini artıq bütün istifadəçilər üçün əlçatan edib. Beləliklə, əvvəlki gözləmə siyahısı ləğv olunub və şəhər sakinləri, eləcə də qonaqlar tətbiqi yükləyərək dərhal sürücüsüz taksi sifariş edə bilirlər. Hazırda robotaksilər Dallas Love Field Hava Limanına sərnişin daşımaq imkanına malik deyil. Şirkət hava limanında avtonom avtomobillərin sınaqlarını davam etdirdiyini və bu marşrutun yaxın zamanda istifadəyə veriləcəyini bildirib.

    Waymo ötən ildən etibarən Dallas küçələrində texnologiyasını sınaqdan keçirməyə başlamış və 2026-cı ildə şəhərdə kommersiya fəaliyyətinə start verəcəyini açıqlamışdı. Şirkət burada elektrik mühərrikli Jaguar I-Pace robotaksilərindən istifadə edir. Avtomobillərin enerji ilə doldurulması və texniki xidməti isə Avis Budget Group tərəfindən həyata keçirilir. Robotaksi xidməti ilk dəfə bu ilin fevral ayında istifadəyə verilsə də, yalnız gözləmə siyahısına qoşulan istifadəçilər yararlana bilirdi. Waymo-nun açıqlamasına görə, bu müddət ərzində təxminən 150 min nəfər Dallasda Waymo tətbiqindən istifadə edib.