Waymo robotaksilərdə Gemini AI köməkçisini sınaqdan keçirir

     Technote.az “TechCrunch” platformasına istinadən bildirir ki, Waymo robotaksilərində Google-un Gemini süni intellekt çat-botunu avtomobil daxili köməkçi kimi test edir. Bu barədə araşdırmaçı Jane Manchun Wong Waymo-nun mobil tətbiq kodlarını araşdırarkən məlumat əldə edib.

     Wong-un yazdığına görə, tətbiqdə “Waymo Ride Assistant Meta-Prompt” adlı, 1200 sətirdən çox olan daxili sənəd tapılıb. Bu sənəd Gemini-nin avtomobil daxilində necə davranmalı olduğunu detallı şəkildə izah edir və onun sadəcə bir çat-botdan daha geniş funksiyalara malik olacağını göstərir.

       Məlumata əsasən, Gemini sərnişinlərin suallarını cavablandıra, avtomobilin temperaturunu, işıqlandırmasını və musiqini idarə edə bilər. Köməkçi qısa, sadə və texniki terminlərdən uzaq cavablar vermək üçün proqramlaşdırılıb. Waymo-nun sözçüsü Julia İlina bildirib ki, şirkət sərnişin təcrübəsini daha rahat və faydalı etmək üçün daim yeni funksiyalar üzərində çalışır, lakin bu yeniliklərin hamısının ictimai istifadəyə çıxacağı hələlik dəqiq deyil.