Waymo robotaksiləri insan sürücülərlə müqayisə etmək üçün yeni model hazırladı

    Waymo robotaksilərinin təhlükəsizliyini insan sürücülərlə daha dəqiq müqayisə edə bilmək üçün yeni kompüter modeli hazırladığını açıqlayıb. Şirkət bu modeli TU Delft universiteti ilə birlikdə hazırlayıb və tədqiqatın nəticələrini Nature Communications jurnalında dərc edib. Waymo-nun bildirdiyinə görə, "Reference Driver" adlandırılan yeni model əvvəlki qiymətləndirmə sistemindən daha real nəticələr təqdim edir. Model "active inference" adlı nəzəriyyəyə əsaslanır. Bu yanaşmaya görə, insan sürücüsü hər an mümkün hadisələri əvvəlcədən proqnozlaşdırır və ən təhlükəsiz qərarı verməyə çalışır.

    Əvvəlki sistemlər əsasən qəza baş verməzdən əvvəlki son saniyələrdə sürücünün reaksiyasını modelləşdirirdisə, yeni "Reference Driver" qəzanın yaranmasına qədər olan bütün qərarvermə prosesini simulyasiya edə bilir. Bunun sayəsində robotaksinin davranışı sadəcə son anda deyil, ümumi vəziyyət kontekstində insan sürücüsü ilə müqayisə olunur.

    Waymo hesab edir ki, bu yanaşma şirkətə robotaksilərinin real yol şəraitində necə davrandığını daha obyektiv qiymətləndirməyə kömək edəcək. Xüsusilə də qəza və ya təhlükəli vəziyyətlər zamanı insan sürücüsünün hansı addımları ata biləcəyini daha dəqiq təxmin etmək mümkün olacaq.