Waymo robotaksisi ilə bağlı daha bir qalmaqal

    Technote.az “TechCrunch” platformasına istinadən bildirir ki, ABŞ-nin Kaliforniya ştatının Santa Monica şəhərində Waymo şirkətinə məxsus robotaksi ibtidai məktəbin yaxınlığında bir uşağı vurub. Hadisə yanvarın 23-də, məktəblərə şagirdlərin gətirildiyi səhər saatlarında baş verib. Şirkətin verdiyi məlumata görə, qəza nəticəsində uşağın aldığı xəsarətlər yüngül olub. Uşağın yaşı və şəxsiyyəti açıqlanmayıb. Hadisə ilə bağlı ABŞ-nin yol təhlükəsizliyinə nəzarət qurumu olan National Highway Traffic Safety Administration (NHTSA) rəsmi araşdırmaya başlayıb.

    Waymo bildirir ki, robotaksi əvvəlcə təxminən 27 km/saat (17 mph) sürətlə hərəkət edib, daha sonra kəskin əyləcləmə edərək sürəti 9 km/saatadək (6 mph) azaldıb. Şirkətin açıqlamasına əsasən, uşaq yol kənarında dayanmış hündür SUV avtomobilinin arxasından qəfil çıxaraq birbaşa avtomobilin hərəkət zolağına daxil olub. Robotaksi piyadanı dərhal aşkar edib, lakin toqquşmanın qarşısını tam almaq mümkün olmayıb.

    Toqquşmadan sonra uşaq ayağa qalxaraq səkiyə keçib. Avtomobil dərhal dayanıb, təcili yardım çağırılıb və polis hadisə yerinə gələnədək nəqliyyat vasitəsi ərazini tərk etməyib. Bu hadisə Waymo-nun robotaksilərinin məktəb avtobuslarını qanunsuz şəkildə ötüb keçməsi ilə bağlı davam edən digər istintaqlarla eyni vaxta təsadüf edir. Şirkət isə iddia edir ki, onların “elmi əsaslara söykənən modeli”nə görə, eyni vəziyyətdə tam diqqətli insan sürücü uşağa təxminən 22 km/saat (14 mph) sürətlə çarpardı.