Waymo San-Fransisko Beynəlxalq Hava Limanında robotaksi xidmətinə başladı

    Technote.az “Engadget” platformasına istinadən bildirir ki, Alphabet şirkətinə məxsus Waymo cümə axşamı günündən etibarən San-Fransisko Beynəlxalq Hava Limanında (SFO) tam avtonom taksi xidmətini istifadəyə verib.

    Hazırda xidmət müəyyən məhdudiyyətlərlə təqdim olunur. İlk mərhələdə robotaksilərdən yalnız “məhdud sayda istifadəçi” yararlana biləcək. Giriş imkanlarının yaxın aylarda tədricən genişləndiriləcəyi bildirilir. Eyni zamanda, xidmətin başlanğıcda yalnız SFO-nun Avtomobil İcarəsi Mərkəzi ilə məhdudlaşdığı qeyd olunur. Waymo gələcəkdə hava limanının terminalları da daxil olmaqla digər ərazilərdə fəaliyyətini genişləndirməyi planlaşdırır.

    San Francisco Standard nəşrinin məlumatına görə, SFO Waymo-nun xidmət göstərdiyi üçüncü hava limanıdır. Şirkət bundan əvvəl Phoenix Sky Harbor və San-Xose Mineta hava limanlarında fəaliyyətə başlamışdı. Ümumilikdə, Waymo hazırda Bay Area-da 260 kvadrat mildən çox ərazini əhatə edir.