Waymo sürücüsüz avtomobillərinin qapısını bağlamaq üçün DoorDash sürücülərinə ödəniş edir

     Technote.az “TechCrunch” platformasına istinadən bildirir ki, Waymo-nun sürücüsüz avtomobilləri artıq altı şəhərdə sərnişin daşıyır və texnoloji baxımdan böyük nailiyyət hesab olunur. Lakin bu “sürücüsüz gələcək” bəzi gözlənilməz problemlərlə də üzləşir. Məlum olub ki, sərnişin avtomobilin qapısını açıq qoyduqda nəqliyyat vasitəsi hərəkətə davam edə bilmir və tamamilə dayanmış vəziyyətdə qalır.

    Bir Reddit istifadəçisinin paylaşımına görə, DoorDash sürücülərindən biri tətbiqdə qeyri-adi sifarişlə qarşılaşıb. Yemək çatdırmaq əvəzinə, ona 1 mildən az məsafə qət edərək Waymo avtomobilinin qapısını bağlamaq üçün 6,25 dollar təklif olunub. Tapşırıq təsdiqləndikdən sonra isə əlavə 5 dollar bonus vəd edilib.

    Məsələ nə qədər ironik səslənsə də, həm Waymo, həm də DoorDash bunun real olduğunu təsdiqləyib. Şirkətlərin birgə açıqlamasına görə, bu pilot layihə hazırda Atlanta şəhərində həyata keçirilir. Qapı açıq qaldığı nadir hallarda yaxınlıqdakı DoorDash sürücülərinə bildiriş göndərilir ki, avtomobil qısa zamanda yenidən xidmətə qayıda bilsin.

    Waymo üçün bu addım iqtisadi baxımdan məntiqlidir. Çünki qapısı açıq qalan avtomobil növbəti sifarişləri icra edə bilmir və üstəlik, yol hərəkətinə mane ola bilər. Şirkət daha əvvəl də oxşar problemlər üçün kənar dəstəkdən istifadə edib. Məsələn, Los Angeles şəhərində Waymo bu cür hallarda Honk platforması ilə əməkdaşlıq edir və bəzi istifadəçilərə qapını bağlamaq üçün 24 dollara qədər ödəniş təklif olunur.