Waymo yeni nəsil robotaksisini istifadəyə verdi

    Waymo daha ucuz istehsal və istismar üçün hazırladığı yeni nəsil Ojai robotaksilərini Los-Anceles, Finiks və San-Fransiskoda bütün sərnişinlər üçün istifadəyə verib. Bu, şirkətin avtonom taksi parkını genişləndirmək və xidmətin xərclərini azaltmaq planında mühüm mərhələ hesab olunur. Hazırda bu üç şəhərdə Waymo vasitəsilə avtomobil sifariş edən istifadəçilərə təsadüfi olaraq yeni Ojai robotaksisi göndərilə bilər. Şirkətin kommersiya parkında təxminən 300 ədəd Ojai var. Avtomobillərin sayı kifayət qədər artdıqdan sonra sərnişinlər Ojai ilə hazırda geniş istifadə olunan Jaguar I-Pace robotaksiləri arasında seçim edə biləcəklər.

    Waymo Ojai modellərini ilin sonuna qədər Denver, Las-Veqas və San-Dieqoda da istifadəyə verməyi planlaşdırır. Waymo uzun illərdir robotaksi xidmətində elektriklə işləyən Jaguar I-Pace avtomobillərindən istifadə edir. Lakin Ojai şirkətin xidmətini daha böyük miqyasda genişləndirmək və gələcəkdə gəlirli biznes modelinə çevirmək planının əsas hissələrindən biridir. Yeni robotaksi Waymo-nun altıncı nəsil avtonom idarəetmə sistemi ilə təchiz olunub. Bu sistem modul quruluşa malikdir və müxtəlif avtomobil modellərinə uyğunlaşdırıla bilir. Ojai həmçinin yenilənmiş istifadəçi interfeysi və sərnişinlərə avtomobil daxilində kömək edən Google Gemini süni intellekt sistemi ilə təchiz edilib.

    Ojai-nin avtomobil platformasını Çinin Geely Holding Group şirkətinə məxsus Zeekr hazırlayır. Waymo Zeekr ilə əməkdaşlığa 2021-ci ildə başlayıb. Miniven tipli avtomobil Zeekr-in robotaksi və çatdırılma avtomobilləri kimi kommersiya nəqliyyat vasitələri üçün nəzərdə tutduğu SEA-M platforması üzərində qurulub. Əsas məqsəd avtomobili sərnişinlər üçün rahat etməklə yanaşı, onun istehsal və texniki xidmət xərclərini azaltmaq və demək olar ki, fasiləsiz istifadəyə davamlı olmasını təmin etməkdir.