Robotaksi Waymo Zeekr-in yeni adı “Ojai” olub

     Technote.az “TechCrunch” platformasına istinadən bildirir ki, Waymo son üç il ərzində Çin avtomobil istehsalçısı Zeekr tərəfindən hazırlanan robotaksi üzərində test və təkmilləşdirmə işləri aparıb. Şirkət bu avtomobili kommersiya istifadəsinə verməzdən əvvəl onun adını dəyişdirdiyini açıqlayıb.

      İndiyədək Zeekr RT kimi tanınan robotaksi bundan sonra Ojai adlanacaq. Yeni ad ABŞ-nin Los-Anceles yaxınlığında yerləşən, sənət icması və sağlam həyat tərzi ilə tanınan Ojai kəndindən götürülüb. Adın tələffüzü isə “oh-hay” kimidir.

      Waymo-nun sözçüsü Chris Bonellinin sözlərinə görə, bu qərarın əsas səbəbi ABŞ ictimaiyyətinin Zeekr brendinə yetərincə bələd olmamasıdır. Rebrendinq sərnişin təcrübəsinə də təsir göstərəcək. Gələcəkdə robotaksi sərnişini “Oh hi” ifadəsi və onun adı ilə salamlayacaq. Waymo ilə Zeekr arasında əməkdaşlıq 2021-ci ildə başlayıb. 2022-ci ildə Los-Ancelesdə keçirilən təqdimatda sükan çarxı olmayan konsept robotaksi nümayiş etdirilmişdi. Lakin CES 2026 sərgisində təqdim olunan Ojai modelində artıq sükan mövcuddur.

       Ojai (keçmiş Zeekr RT) Phoenix və San-Fransisko kimi şəhərlərdə geniş sınaqlardan keçirilib. Avtomobil 13 kamera, 4 lidar, 6 radar, xarici səs sensorları və sensorlar üçün mini şüşəsilənlərlə təchiz olunub. Texniki hissə dəyişməz qalsa da, avtomobilin rəngi mavi çalardan daha gümüşü tona keçirilib.

       Hazırda Waymo əməkdaşları San-Fransisko və Phoenix şəhərlərində bu robotaksini sifariş edə bilirlər. Bu mərhələ adətən xidmətin geniş ictimaiyyət üçün açılmasından əvvəl atılan son addım hesab olunur.

       Waymo hazırda Atlanta, Austin, Los-Anceles, Phoenix və San-Fransiskoda fəaliyyət göstərir. Şirkət qarşıdakı bir il ərzində Denver, Las Veqas və London da daxil olmaqla daha 12 şəhərdə xidmətə başlamağı planlaşdırır.