Xiaomi-nin yüksək performanslı SU7 Ultra prototip elektrik avtomobili Nyürburqrinq trekini 6:46.874 saniyəyə tamamlayaraq, bu trekdəki ən sürətli dördqapılı avtomobil olub. Eyni zamanda bu nəticə ilə ilin əvvəlində Porsche Taycan Turbo GT-nin 7:07.55-lik rekord nəticəsini də qırıb.

     Üstəlik, avtomobil təxminən 12 saniyə güc itirməsinə baxmayaraq, bu reytinqə nail ola bilib. Xiaomi, SU7 Ultra-nın yollarda qanuni şəkildə istifadə edilə biləcəyini bildirsə də, rekord sınağı üçün istifadə olunan avtomobilin içinin yüngülləşdirilməsi üçün bəzi hissələrinin çıxarıldığını və təhlükəsizlik qəfəsi ilə təchiz edildiyini qeyd edib. Ancaq bu metoddan bir çox istehsalçı istifadə edir və bu, avtomobilin effektiv bir zaman əldə etdiyi faktını dəyişmir.

     Bu yay təqdim olunan və təxminən 112.500 dollar qiymətindən satışa çıxarılması gözlənilən hiper avtomobil, Xiaomi tərəfindən hazırlanan 3 mühərrikli 4 təkərdən çəkiş sisteminə malikdir və 1529 at gücü (1140 kVt) ilə 0-dan 100 km/s sürətə yalnız 1.97 saniyədə çatır. Avtomobilin maksimum sürəti isə 350 km/s-dir. Bu göstəricilərlə SU7 Ultra, dünyadakı digər sedan avtomobillərdən (elektrik və ya daxili yanma mühərrikli) daha sürətli və daha güclüdür. O, Lucid Air Sapphire-in 1234 at gücünü, Tesla Model S Plaid-in 1020 at gücünü və Porsche Taycan Turbo GT-nin 1092 at gücünü geridə qoyur.

     Karbon-keramikadan hazırlanmış, öz sinfinin ən böyük əyləc disklərinə sahib olacaq avtomobil, yarış avtomobillərinə xas olan Bilstein EVO T1 təkərləri ilə təchiz ediləcək. Xiaomi ötən dekabr ayında ilk elektrikli avtomobili SU7-ni təqdim etmiş və rəsmi olaraq mart ayında bazara çıxarmışdı. 30.760 dollardan başlayan qiymətlərlə satışa çıxarılan avtomobil böyük maraq doğurmuş və bu il üçün nəzərdə tutulan 100.000 ədədlik istehsal hədəfini aşmağa hazırlaşır. Xiaomi, yüksək tələbatı ödəmək üçün 2025-ci ilin ortalarına qədər fabrikində genişləndirmə işlərini tamamlamağı planlaşdırır.