Xiaomi SU7 Ultra-nın final versiyası təqdim edilib - QİYMƏTİ

Nəqliyyat

28.02.2025

Emil

Xiaomi şirkəti SU7 Ultra adlı idman elektromobilini hələ keçən ilin iyul ayında sərgiləmişdi. Lakin həmin vaxtda sərgilənmiş SU7 Ultra sadəcə prototip şəklində idi. İndi isə Xiaomi Çində SU7 Ultra modelinin final versiyasını rəsmi olaraq təqdim edib. Bu model standart SU7-nin təkmilləşdirilmiş versiyasıdır və Xiaomi bu avtomobillə bahalı idman avtomobilləri bazarında Porsche-yə rəqib olmağı hədəfləyir. Lakin şirkət Porsche ilə rəqabətlə kifayətlənmək niyyətində deyil və digər aparıcı avtomobil istehsalçıları ilə də rəqabət aparmağı planlaşdırır. Xiaomi-nin qurucusu, direktorlar şurasının sədri və baş direktoru Lei Jun təqdimat zamanı bildirib ki, şirkətin məqsədi SU7 Ultra-nı aşağıdakı səviyyələrdə rəqibə çevirməkdir:

- Performans baxımından Porsche

- Texnologiya sahəsində Tesla

- Lüks sinifdə Audi, Mercedes-Benz və BMW.

O, SU7 Ultra-nı "bu dövr üçün ideal avtomobil" adlandırıb. Xiaomi SU7 Ultra tam elektriklə çalışan sedan modelidir və növbəti ölçülərə malikdir. Təkər bazası 3000 mm, uzunluq 5070 mm, en 1970 mm, hündürlük 1465 mm. Beləliklə, bu model standart SU7-dən daha böyük olub. Bundan əlavə, SU7 Ultra 2360 kq çəkiyə malikdir və bunun əsas hissəsi böyük həcmli batareyanın payına düşür. Xiaomi SU7 Ultra modeli 3 elektrik mühərriki ilə təchiz olunub və ümumi maksimal gücü 1138 kilovat (1547 at gücü), maksimal fırlanma anı isə 1770 Nm (Nyuton metr) təşkil edir.

Bu güclü mühərriklər SU7 Ultra-nın 0-dan 100 km/saat sürətə cəmi 1.98 saniyəyə çatmasına, 0-dan 200 km/saat sürətə isə 6.09 saniyəyə çatmasına imkan verir. Xiaomi iddia edir ki, bu, planetin ən sürətli seriyalı dördqapılı avtomobilidir. Maksimal sürəti 359 km/saatdır. SU7 Ultra-nın enerji mənbəyi üçlü litium-ion batareya bloku - CATL Qilin 2.0-dır. Batareyanın ümumi tutumu 93.7 kilovat-saat, CLTC dövrü üzrə yürüş məsafəsi isə 630 km təşkil edir. Bununla yanaşı batareya tərəfindən sürətli şarj texnologiyası dəstəklənir - 10%-dən 80%-ə qədər cəmi 11 dəqiqəyə enerji yığır.

Təkərlər və Əyləc Sistemi:

- 21 düym-lük təkərlər, Pirelli P Zero 5 şinləri ilə

- Ön əyləc diskləri: 430 mm karbon-keramika (idman avtomobillərində quraşdırılmış ən böyük əyləc diskləridir)

- Arxa əyləc diskləri: 410 mm

- Ön oxda 6 porşenli Akebono əyləc kaliperləri, arxa oxda isə 4 porşenli kaliperlər mövcuddur

- 100 km/saat sürətdən tam dayanma məsafəsi cəmi 30.8 metrdir.

Xiaomi SU7 Ultra yüksək performansı, sürətli şarj imkanları və güclü əyləc sistemi ilə idman avtomobilləri seqmentində yeni standartlar müəyyən edir. Bundan əlavə, Xiaomi alıcılara 100 000 yuan əlavə ödəniş etməklə "yarış paketi" əldə etmək imkanı təklif edir. Bu paketə təkmilləşdirilmiş amortizatorlar, xüsusi təkərlər və yüksək performanslı əyləc yastıqları daxildir. Xiaomi rəhbərinin sözlərinə görə, yarış paketi ilə təchiz olunmuş SU7 Ultra, Porsche Taycan Turbo GT ilə rəqabət apara bilər. Porsche Taycan Turbo GT-nin Çin bazarındakı qiyməti 1.998 milyon yuandır. Üstəlik, Xiaomi SU7 Ultra bu modeli Şanxay Beynəlxalq Yarış Trasında geridə qoyub:

- SU7 Ultra dövrə vaxtı: 2 dəqiqə 9.944 saniyə

- Porsche Taycan Turbo GT dövrə vaxtı: 2 dəqiqə 11.28 saniyə.

Bu idman elektromobilinin salonunda geniş karbon lif materiallarından istifadə olunub. Alkantara ilə örtülmüş idman oturacaqları var. Sükan arxasında sürət dəyişdirmə "qanadları" (paddle shifters) mövcuddur. Salonun ön tərəfdən mərkəzi hissəsində böyük ölçülü sensorlu ekran quraşdırılıb. Avtomobildə ümumilikdə 25 ədəd səsgücləndirici var, o cümlədən sürücü üçün ayrıca səs sistemi mövcuddur. Salon iki ədəd 50 vatt gücündə naqilsiz smartfon şarjı texnologiyası ilə təchiz edilib. Elektromobilin sistemi səsli əmrləri dəstəkləyir və sahibinin səsini tanıya bilir.

Xiaomi SU7 Ultra həm performans, həm də lüks baxımından yüksək standartlara cavab verən bir model olaraq təqdim edilir. Xiaomi SU7 Ultra-nın ağıllı yürüş sistemi yüksək səviyyədə avtonom idarəetmə imkanları təqdim edir. Bu sistem üç LiDAR sensoru, 12 kamera və 5 millimetr dalğa diapazonlu radar ilə təchiz olunub. Sürücüyə yardım funksiyalarına qismən avtopilot, avtomatik parketmə və avtonom fövqəladə əyləcləmə sistemi daxildir. Xiaomi SU7 Ultra üçün ilkin sifarişlər 2024-cü ilin oktyabr ayında qəbul edilməyə başlanıb. Yeni təqdimat ilə modelin start qiyməti 529 900 yuan (təxminən 72 830$) müəyyən edilib.

Müqayisə üçün Çində ən ucuz yeni Porsche modeli 650 000 yuana (89 530$) təklif olunur. Xiaomi SU7 modelinin baza versiyasının qiyməti isə 215 900 yuan (29 738$) təşkil edir. Xiaomi SU7 Ultra-nın yüksək qiymətinə baxmayaraq, model satışda böyük uğur qazanıb. İlkin sifarişlər başladıqdan cəmi 10 dəqiqə ərzində 6900-dən çox sifariş qəbul edilib. İlk 2 saatda bu rəqəm 10 000-i keçib. Bütün sifarişlər real müştərilər tərəfindən edilib, çünki ilkin sifariş üçün geri qaytarılmayan 20 000 yuan depozit tələb olunur. Təslimatlara yaxın zamanda start veriləcək. Xiaomi SU7 Ultra 2 mart bazar günü MWC 2025 sərgisində (Barselona) beynəlxalq bazar üçün təqdim ediləcək.

Mənbə: Carnewschina

Paylaş

Xiaomi

xiaomi su7 ultra

Bənzər xəbərlər