ABŞ Ticarət Nazirliyi öz əməkdaşlarına DeepSeek-dən istifadəni qadağan edib

     Süni zəka sistemlərinin sürətli inkişafı informasiya təhlükəsizliyi üçün ciddi çağırış yaradıb, çünki böyük həcmdə məlumat massivləri həssas informasiyanı da əhatə edə bilər. ABŞ Ticarət Nazirliyi, milli təhlükəsizliklə bağlı narahatlıqlara əsaslanaraq, əməkdaşlarına işçi cihazlarında DeepSeek istifadə etməyi qadağan edib. Reuters tərəfindən istinad edilən daxili məlumatlara görə, nazirliyin işçi cihazlarından Çində böyük dil modelləri və eyni adlı çat-bot hazırlayan DeepSeek şirkətinin resurslarına və tətbiqlərinə giriş məhdudlaşdırılıb. Rəsmi şəxslərin sözlərinə görə, bu məhdudiyyət nazirliyin informasiya sistemlərini qorumaq üçün tətbiq edilib.

     İşçilərə göndərilən tövsiyədə bu, açıq şəkildə vurğulanır:  “DeepSeek ilə əlaqəli hər hansı mobil və ya masaüstü tətbiqləri, eləcə də bu şirkətə aid olan veb saytları yükləməyin, baxmayın və istifadə etməyin”. Hələ fevral ayında bir qrup amerikalı konqresmen, ABŞ rəsmilərinin işçi cihazlarında DeepSeek istifadəsinin qanunvericiliklə qadağan edilməsi təşəbbüsü ilə çıxış etmişdi. Bu ay isə bu qadağanın tətbiq olunmasını tövsiyə edən məktub ABŞ-ın müxtəlif dövlət qurumlarına göndərilib.

     Konqresmenlər DeepSeek istifadəçilərinin bilmədən Çin tərəfinə hökumətə aid vacib sənədlərə - o cümlədən müqavilə mətnləri və maliyyə hesabatlarına - giriş imkanı yarada biləcəyindən narahatdırlar. 21 ştatın baş prokurorundan ibarət bir koalisiya artıq ABŞ Konqresinə müraciət edərək, DeepSeek-in rəsmi qurumlarda istifadəsinin qadağan olunmasını tələb edib. Yerli səviyyədə isə bu cür qadağalar artıq Virciniya, Texas və Nyu-York ştatları da daxil olmaqla, bir neçə digər ştatda qüvvəyə minib.

Mənbə: Reuters