Açıq mənbəli layihə CUDA proqramlarını Windows-da AMD videokartında işlədir

    “Speedstu” adlı müstəqil proqramçı “Windows” sistemində “AMD” videokartlarında “NVIDIA CUDA” üçün yazılmış proqramları işlədən açıq mənbəli layihə hazırlayıb. “CUDA for AMD Windows” adlı həll üçün virtual maşın qurmağa və ya kompüterə 2 əməliyyat sistemi yazmağa ehtiyac yoxdur. Layihə hələ sınaq mərhələsində olsa da, Radeon RX 9060 XT videokartında real süni intellekt tapşırığını yerinə yetirib.

    Layihə ayrıca proqram mühiti deyil. Burada “CUDA” proqramlarını “AMD” videokartlarına uyğunlaşdıran “ZLUDA” qatı şirkətin “HIP” və “ROCm” alətləri ilə birləşdirilib. Avtomatlaşdırılmış “PowerShell” skripti videokartın quruluşunu müəyyənləşdirir, “ZLUDA” proqramının v6-preview.69 versiyasını endirir və onu lazımi riyazi kitabxanalara qoşur. “AMD” artıq “Windows” sistemində “PyTorch” və “HIP SDK” proqramlarını dəstəkləyir. Rəsmi siyahıya “Radeon RX 7000” və “RX 9000” seriyaları daxildir.

    Proqramçı “CUDA” sürücü interfeysini, eləcə də “cuBLAS”, “cuSPARSE” və “cuFFT” kitabxanalarını “AMD” üçün olan qarşılıqları ilə işlədə bilib. Sınaq zamanı dəyişdirilməmiş “CUDA” kitabxanaları ilə 2,2 milyon parametrli PPO süni intellekt modeli başdan sona öyrədilib. Test Radeon RX 9060 XT videokartında aparılıb və layihə hazırda rəsmi olaraq yalnız bu modeli dəstəkləyir.

    Rəsmi “ZLUDA” buraxılışı və “HIP SDK 6.4” ilə keçirilən testdə sistem saniyədə median hesabla 13 278 addım emal edib. Köhnə “ZLUDA” fayllarından hazırlanan xüsusi variantda bu göstərici 12 876 addıma düşüb. Yəni nəticə təxminən 3% aşağı olub. Həmin variantda süni intellekt modelinin nəticə çıxarma müddəti 7,33%, PPO öyrənmə müddəti də 2,75% artıb. Sonradan yenidən yazılan versiyanın daha sürətli işləməsi hazırkı uyğunlaşdırma qatlarının sistemə əlavə yük saldığını göstərir.

    Uyğunluq hələ məhduddur. Süni intellekt proqramlarında geniş işlənən “cuDNN”, “TensorRT” və “NCCL” kitabxanaları hazırda işləmir. Buna görə həmin kitabxanalardan asılı proqramları açmaq olmur. “ZLUDA” kommersiya dəstəyini itirib və indi həvəskar layihə kimi saxlanılır. Bu səbəbdən həll peşəkar istehsal sistemlərində istifadə üçün risklidir. Ancaq layihə açıq mənbəlidir, buna görə gələcəkdə yeni videokart və kitabxanaların dəstəyi əlavə edilə bilər.