Apple iOS 27 ilə kilid ekranına 4 yeni fərdiləşdirmə seçimi əlavə edəcək

    “Apple” şirkətinin “iOS 27” sistemi “iPhone” kilid ekranına 4 yeni fərdiləşdirmə seçimi əlavə edəcək. İstifadəçilər süni intellektlə divar kağızını genişləndirə, yeni şəkil yarada və saatın yerini dəyişə biləcəklər. Səsləndirilən məzmunu göstərən vidceti də ekrandan yığışdırmaq olacaq.

    “Extend” funksiyası seçilən foto ekran ölçüsünə uyğun gəlmədikdə avtomatik görünəcək. Süni intellekt şəklin kənarlarına yeni detallar əlavə edərək boş qalan hissələri dolduracaq. Beləliklə, fotonun ölçü nisbətini dəyişmək, üfüq xəttini düzəltmək və onu divar kağızına uyğunlaşdırmaq olacaq.

    “iOS 27” seçim pəncərəsindəki “Image Playground” aləti ilə divar kağızı yaratmağı da asanlaşdıracaq. Alət “Photos” tətbiqindəki şəkilləri “Retro Illustration” və “Animation” kimi üslublarda yenidən hazırlaya biləcək. İstifadəçi istədiyi görüntünü adi sözlərlə təsvir edib sıfırdan fərdi divar kağızı da yarada biləcək.

    Başqa bir dəyişiklik kilid ekranındakı saata aiddir. Əvvəlki versiyalarda yalnız saatın ölçüsünü dəyişmək olurdu. “iOS 27” isə saatı kiçiltməklə yanaşı, onu vidcetlərin ən yuxarı sırasına keçirməyə imkan verəcək. Belə olduqda divar kağızının daha böyük hissəsi görünəcək, amma saatı uzaqdan oxumaq bir qədər çətinləşə bilər.

    “Now Playing” vidcetini də kilid ekranında sürüşdürərək gizlətmək olacaq. Vidcet bağlansa belə, musiqi və ya başqa audio məzmun səslənməyə davam edəcək. Yenilik vidcetə təsadüfən toxunmağın və səs idarəetmə düymələrini səhvən açmağın qarşısını almağa kömək edəcək.