Apple oyunlar üçün Game Center əvəzinə yeni tətbiqi istifadəyə verəcək

     Apple videooyunlar üçün ayrıca bir tətbiqin istifadəyə verilməsinə hazırlaşır. Bu tətbiq iPhone, iPad, Mac və Apple TV cihazlarında əvvəlcədən quraşdırılmış olacaq. Gözlənilir ki, şirkət tətbiqi gələn ay baş tutacaq WWDC 2025 konfransından bir neçə gün əvvəl təqdim edəcək (konfrans 9 iyunda başlayır). Yeni oyun mərkəzi oyunların işə salınması, nailiyyətlər, lider cədvəlləri, daxili mesajlar və digər oyun funksiyalarını özündə birləşdirəcək. Bu tətbiq 2010-cu ildən mövcud olan, lakin oyunçular arasında geniş məşhurluq qazanmayan Game Center platformasını əvəz edəcək.

     Bloomberg-in məlumatına görə, yeni mərkəz oyunlarla bağlı redaksiya materiallarını, App Store bölməsini və aylıq 6.99$ dəyərində olan Apple Arcade abunəliyinin təşviqini də əhatə edəcək. Həmçinin, App Store-dan kənar yüklənmiş oyunları işə salmağa imkan verən Mac versiyası da təqdim olunacaq. Qeyd olunur ki, oyunlar App Store-un əsas kateqoriyası olaraq qalır və platformanın gəlirinin üçdə ikisi, o cümlədən oyun daxili alışlar ilə bağlıdır. Son dövrlərin diqqətçəkən layihələri arasında “Resident Evil”, “Death Stranding” və “Assassin’s Creed” kimi oyunlar göstərilə bilər. Apple oyun sahəsində mövqeyini gücləndirmək üçün Sneaky Sasquatch oyunu ilə tanınan RAC7 Games studiyasını da alıb.

     Bu oyunların Mac versiyaları da daha güclü çiplər və mövcud layihələrin bu əməliyyat sisteminə uyğunlaşdırılmasını asanlaşdıran alətlər sayəsində dəstək qazanır. Bu yeni oyun tətbiqi iOS-un növbəti versiyasının tərkibinə daxil ediləcək və həmin yeniləmə bu ilin payızında yeni nəsil iPhone ilə birlikdə yayımlanacaq. Apple həmçinin Solarium kod adı ilə hazırlanmış yenilənmiş interfeys, süni zəka optimallaşdırılmış enerji sərfiyyatı, təkmilləşdirilmiş tərcüməçi, AirPods və Siri vasitəsilə səsli tərcümə, iki istiqamətli klaviatura (ərəb və ingilis dilləri üçün), Apple Pencil üçün virtual qələm və Wi-Fi üzərindən otellərdə sinxronlaşdırılmış giriş sistemi kimi yeniliklər təqdim etməyi planlaşdırır.