Apple özünün ChatGPT analoqu üzərində çalışır

     Apple yeni Answers, Knowledge and Information adlı bölməsi üçün 10-dan çox vakansiya elan edib. Bu bölmə Siri və Safari-nin təkmilləşdirilməsi ilə məşğul olacaq. Bundan əlavə, Bloomberg-in məşhur insayderi Mark Gurman-ın məlumatına görə, Apple ChatGPT-yə bənzər süni intellekt əsaslı axtarış sistemi üzərində işləməyə başlayacaq. Şirkətin planına görə, yeni süni intellekt internetdə məlumat axtara və istifadəçilərin suallarına cavab verə biləcək. Vakansiyaların təsvirində qeyd olunur ki, komanda böyük dil modelləri (LLM) üzərində işləyir və bu modellər “istifadəçilərin şəxsi məlumatlarından istifadə edərək sorğulara cavab verməli, eyni zamanda məxfilik qorunmasını prioritet tutmalıdır”.

     Xüsusilə, Apple bu istiqamətdə bir sıra mütəxəssislərlə yanaşı, Siri-nin istifadəçi şəxsi məlumatları ilə bağlı suallara daha dəqiq cavab vermə qabiliyyətini artırmaq üçün təcrübəli machine learning mühəndisi də axtarır. Məlumata görə, Apple prinsipcə yeni bir axtarış həllinin hazırlanmasının erkən mərhələsindədir. Söhbət, internet məzmununu analiz edə və ümumi suallara geniş cavablar verə bilən cavab mühərrikinin yaradılmasından gedir - bu, ChatGPT-yə bənzər bir yanaşmadır. Hətta bu funksiya üçün ayrıca bir tətbiqin buraxılması variantlardan biri kimi nəzərdən keçirilir.

     Qeyd edək ki, Apple daha əvvəl Siri-nin konteksti daha yaxşı anlayan yenilənmiş versiyasını elan etmişdi. Lakin Mark Gurman-ın məlumatına görə, tam funksional süni intellekt köməkçisi iOS 27-dən tez təqdim olunmayacaq. Cari vakansiyalar da göstərir ki, şirkət məhz böyük dil modelləri texnologiyasına maraq göstərir. Vəzifə təsvirlərində vurğulanır ki, yeni funksiyalar istifadəçilərin şəxsi məlumatları ilə işləyəcək, lakin bu zaman Apple ekosisteminin əsas üstünlüklərindən biri olan məxfilik prinsiplərinə ciddi şəkildə riayət olunacaq.