"anH0I" istifadəçi adına sahib Reddit istifadəçisinin paylaşdığı görüntüyə aşağıdakı fotodan baxa bilərsiniz. Telefonun ekranında Windows 11-in yükləndiyi birbaşa görünür. İstifadəçinin bildirdiyinə görə, bunu Android telefonlara Windows yükləməyə imkan verən Renegade Project vasitəsilə həyata keçirib. Ancaq bu vasitədən istifadə etməklə belə sistemi düzgün işlətmək təxminən 8 saat vaxt aparıb. Yəni bu, asan bir proses deyil.

     Paylaşımı görən insanlar dərhal şərhlərdə bu Android cihazda Windows 11-in necə işlədiyi ilə bağlı suallar ünvanlayıblar. Təxmin edəcəyiniz kimi, bu əməliyyat sistemi, bu cihazda çox da uğurlu nəticələr verməyib. İstifadəçinin verdiyi məlumata görə, Windows 11 yükləndikdən sonra cihazın batareya ömrü çox pis vəziyyətə düşüb. Batareyanın tam boşalması 2.5 saata qədər azalıb. Üstəlik, hər hansı sürətli enerji doldurma sürücüsü olmadığı üçün cihaz çox yavaş şəkildə enerji yığır. Bununla yanaşı, telefonun çox tez bir zamanda həddindən artıq qızdığını da əlavə edib. Yəni başa düşəcəyiniz kimi, hər nə qədər maraq doğurucu olsa da, telefona Windows 11 yükləmək heç də məntiqli deyil.