Britaniyalı startap məlumatların innovasiyalı sıxılması alqoritmini hazırlayır

     Britaniyalı startap məlumatların itkisiz sıxılması məsələsində irəliləyiş əldə etdiyini iddia edir. Yaradıcıların sözlərinə görə, CompressionX alqoritmi faylın diskdə tutduğu yeri 65%-dək azaltmağa kömək edir. CompressionX texnologiyası bazardakı ən yaxşı sıxma vasitələrinə alternativ kimi təqdim olunur - həm ekoloji cəhətdən daha uyğun, həm də biznes üçün əlverişli bir alət kimi. Bu texnologiya ənənəvi sıxma üsullarından fərqli işləyir, çünki onun əsasında ümumi sıxma proseduru deyil, ağıllı və adaptiv alqoritm dayanır - bu alqoritm fayl strukturunu daha məntiqli şəkildə analiz edir.

     Proqnozlara əsasən, 2030-cu ilə qədər məlumat emalı mərkəzləri qlobal karbon emissiyalarının 8%-nə qədərini təşkil edə bilər və artıq bu gündən etibarən optimallaşdırma barədə düşünmək vacibdir. Texnologiyanın yaradıcıları CompressionX-i fərqləndirən bir neçə funksiyanı qeyd edirlər. Bunlara Avropa Ümumi Məlumatların Qorunması Qaydalarına (GDPR) uyğun arxivləşdirmə, XChaCha20 şifrələmə dəstəyi, eləcə də ZIP və 7Z formatları ilə uyğunluq daxildir.

     Tərtibatçılar bildirirlər ki, bu alqoritm məşhur bulud yaddaş xidmətlərindən istifadə edənlər üçün faydalı ola bilər. O, yaddaş sahəsinə qənaət edir və böyük faylların köçürülməsini asanlaşdırır. Lakin CompressionX-in bir çatışmazlığı da var: pulsuz rejimdə alqoritmin yalnız əsas funksiyaları və ayda maksimum 35 GB həcmində məlumat sıxılması mövcuddur. Limitsiz imkanlar və biznes müştərilər üçün istifadə haqqı 3.99 funt sterlinq (təxminən 5.43$) təşkil edir və bu ödəniş ildə bir dəfə qabaqcadan ödənilir.