ChatGPT-də proqramlaşdırma üzrə Codex süni zəka agenti istifadəyə verilib (VİDEO)

     OpenAI proqramlaşdırmanın avtomatlaşdırılması üçün nəzərdə tutulmuş Codex adlı süni zəka agentini təqdim edib. Bu gündən etibarən Codex əlavə ödəniş olmadan ChatGPT Pro, Enterprise və Team abunəçiləri üçün əlçatandır. Alət müstəqil şəkildə səhvləri düzəldir, testlər həyata keçirir və kodda dəyişikliklər təklif edir. Yəni tərtibatçılar üçün virtual həmkar kimi fəaliyyət göstərir. OpenAI şirkətinin rəhbəri Sam Altman, Codex-i ChatGPT-nin sadəcə təkmilləşdirilmiş versiyası kimi deyil, tam müstəqil bir məhsul kimi təqdim edir. Agent sadə mətn sorğusu əsasında kod yarada, mövcud kodu optimallaşdıra və paralel olaraq bir neçə tapşırığı yerinə yetirib sonradan onlara qayıda bilir.

     Mürəkkəb tapşırıqların yerinə yetirilməsi 30 dəqiqəyə qədər vaxt apara bilər, lakin The Verge saytının məlumatına görə, gələcəkdə bu agentin avtonom iş vaxtının artırılması planlaşdırılır. Codex ChatGPT-nin veb versiyasına inteqrasiya olunub, lakin hazırda internetə çıxışı yoxdur. Bu, təhlükəsizliklə bağlı riskləri azaltmaq məqsədilə həyata keçirilib. O, OpenAI tərəfindən xüsusi olaraq proqramlaşdırma tapşırıqları üçün optimallaşdırılmış codex-1 adlı o3 modelinin ixtisaslaşdırılmış versiyası əsasında işləyir. OpenAI həmçinin bildirib ki, Codex Cursor və Windsurf kod redaktoru kimi digər süni zəka alətlərini tamamlayacaq.

     Bundan əlavə, şirkət təxminən 3 milyard dollar dəyərində Windsurf-un alınması ilə bağlı danışıqlar aparır. Qeyd olunur ki, hazırda Codex-in imkanları məhduddur, lakin zamanla bu agent proqramlaşdırma ilə bağlı bütün rutin tapşırıqları tam şəkildə üzərinə götürə biləcək. Şirkət nümayəndələri bildiriblər: “Biz inanırıq ki, gələcəkdə proqramlaşdırma ayrı bir kompüterdə işləyən agentin ətrafında qurulacaq və insanlar sadəcə ona tapşırıqları həvalə edəcəklər”. Sam Altman isə proqramlaşdırmanı “OpenAI-nın gələcəyi üçün əsas istiqamət” adlandırır. Qeyd etmək lazımdır ki, Codex tamamilə yeni bir məhsul deyil.

     Bu ad daha əvvəl, 2021-ci ildə təqdim edilmiş və OpenAI-nın kod generasiyası üçün ilk aləti olan məhsula verilmişdi. Hazırda isə süni zəkanın proqramlaşdırmaya dəstəyi o qədər vacib və rəqabətli mövzuya çevrilib ki, OpenAI bu sahədə kənarda qala bilməzdi. Anthropic bu sahəni aktiv şəkildə inkişaf etdirir, Windsurf isə yeni süni zəka modelləri seriyasını yeni təqdim edib. Google isə yaxın vaxtlarda Gemini-yə GitHub-a qoşulma imkanı əlavə edib və AlphaEvolve adlı alqoritmik inkişaf agentini təqdim edib. Maraqlıdır ki, Codex-in təqdimatı bu həftə keçiriləcək illik Google I/O konfransından bir neçə gün əvvəl baş tutub. OpenAI ilə Google arasındakı rəqabəti nəzərə alaraq, bu zaman seçiminin təsadüfi olduğu inandırıcı görünmür.

Mənbə: The Verge