ChatGPT istifadəçi tərəfindən qeyd edilən faktları yaddaşında saxlaya biləcək

     OpenAI şirkəti ChatGPT-də yeni funksiyanın testinə start verib. Yeni funksiya çərçivəsində istifadəçi ChatGPT-dən bu və ya digər faktı yaddaşında saxlamağı istəyə bilər. Nəticədə gələcəkdə çat-bot istifadəçiyə eyni mövzu barəsində suallar vermək əvəzinə yaddaşında saxlamış olduğu fakt əsasında cavabları tərtib edə biləcək. Sözügedən funksiyadan istifadə olunmadığı halda çat-bot hər bir sessiya zamanı istifadəçidən hər hansısa mövzu ətrafında dəqiqləşdirici məlumatlar istəyir.

     Test edilən yeni funksiya ilə isə müəyyən faktların ChatGPT-nin yaddaşında qalması mümkün olacaq. Bu yeni funksiyanın idarəsi üçün ChatGPT-nin ayarlarına müvafiq bənd əlavə edilib. Xüsusi paneldə çat-botun hansı faktları öz yaddaşında saxladığına baxmaq olar. Bununla yanaşı istifadəçi çat-botun yaddaşından istədiyi faktları silə bilər. Lazımi faktları çat-botun yaddaşına daxil etmək üçün sadəcə olaraq ünsiyyət çərçivəsində ondan bu və ya digər faktı yaddaşında saxlamasını istəmək lazımdır.