ChromeOS ilə Android-in birləşdirilməsi planı rəsmi şəkildə təsdiqlənib

     Google şirkəti ChromeOS və Android əməliyyat sistemlərini birləşdirməyi planlaşdırdığını rəsmi şəkildə təsdiqləyib. Bu barədə ilk şayiələr hələ ötən ilin payızında yayılmışdı. Google-da Android ekosisteminin prezidenti Sameer Samat geniş bir müsahibə çərçivəsində TechRadar portalının jurnalistindən niyə Apple Watch, iPhone və MacBook istifadə etdiyini soruşub. O, sualını belə izah edib: “Bu sualı verdim, çünki biz ChromeOS və Android-i vahid platformaya birləşdirməyə hazırlaşırıq və insanların hazırda noutbuklardan necə istifadə etdikləri və onlarla nə etdikləri mənim üçün çox maraqlıdır”.

     Bu, Google-un iki platformanı birləşdirmə planlarını ictimai şəkildə təsdiqlədiyi ilk haldır. Şirkət nümayəndəsi TechRadar-la söhbətində bu təşəbbüslə bağlı təfərrüatları açıqlamayıb. Lakin əvvəlki şayiələr göstərirdi ki, Google tamamilə yeni bir platforma yaratmaq əvəzinə ChromeOS-i Android-ə keçirməyi planlaşdırır. Qeyd olunası maraqlı məqam odur ki, şirkət rəhbərliyi bu təşəbbüs çərçivəsində istifadəçilərdən noutbuklardan necə istifadə etdiklərini soruşur.

     Bu isə onu göstərir ki, Google layihəni rəsmi istifadəyə verməzdən əvvəl onu təkmilləşdirməyin yollarını hələ də axtarır. Google-un ChromeOS və Android əməliyyat sistemlərini birləşdirmək planlarını təsdiqləməsi, eyni zamanda Android-ə böyük ekranlarda istifadə rahatlığını artırmağa yönəlmiş bir sıra yeni funksiyaların inteqrasiyası fonunda baş verib. Bu funksiyalar arasında tam funksiyalı masaüstü rejimi, pəncərə rejimi, xarici ekranların idarə olunmasının təkmilləşdirilməsi və tətbiqlərin daha yaxşı uyğunlaşma qabiliyyəti yer alır.