Logo
    main-post-cover

    Çin DeepSeek-i aktiv şəkildə bütün fəaliyyət sahələrinə inteqrasiya edir

    Proqram Təminatı
    17.03.2025
    Emil
         Çin şirkətləri patriotizm nümayişi və yerli süni zəka startapı DeepSeek-in uğurlarının yaratdığı səs-küy fonunda R1 adlı məntiqi düşünmə modeli və V3 böyük dil modelini avtomobil sənayesindən tutmuş smartfonlar, məişət texnikası, səhiyyə və dövlət qurumlarına qədər müxtəlif sahələrdə sürətlə tətbiq edirlər. Çində inanırlar ki, ölkənin süni zəka sahəsində rəqabət üstünlüyü təkcə güclü modellər yaratmaqda deyil, həm də onları çoxşaxəli praktik istifadəyə yönləndirməkdədir. Üstəlik, DeepSeek-in tərtibatçıları bildirirlər ki, R1 və V3 modelləri keyfiyyət baxımından Qərb alternativləri ilə müqayisə oluna bilsə də, istifadəsi xeyli daha ucuzdur. Bu amil süni zəkanın effektiv tətbiqi üçün mühüm rol oynayır.
         Çin avtomobil sənayesində artıq 20-dən çox brend DeepSeek-in tətbiqini elan edib. Ölkənin ikinci ən böyük avtomobil istehsalçısı Geely Auto, süni zəka ilə təchiz olunmuş avtomobillərinin mürəkkəb əmrləri yerinə yetirə bildiyini nümayiş etdirib - məsələn, sürücü üçün rahat istirahət şəraiti yaratmaq kimi. Huawei, OPPO, Honor, Vivo Xiaomi də daxil olmaqla Çinin aparıcı smartfon istehsalçıları DeepSeek-i öz sistemlərinə inteqrasiya ediblər. Huawei, məsələn, R1 modelindən Xiaoyi səsli köməkçisini yeniləmək üçün istifadə edir, beləliklə istifadəçilərə həm sürətli cavablar, həm də dərin məntiqi düşünmə qabiliyyəti arasında seçim etmək imkanı verir.
         OPPO şirkətinin məhsul direktoru Liu Zuohu isə bildirib ki, DeepSeek sayəsində cəmiyyət süni zəka texnologiyalarına daha sürətlə uyğunlaşır. “Biz gözləyirdik ki, insanları süni zəka sahəsində maarifləndirmək üçün ən azı 2 il vaxt lazım olacaq, amma DeepSeek bu prosesi olduqca sürətləndirdi. Bu, bizim üçün çox faydalıdır” - deyə Liu Zuohu qeyd edib. Məişət texnikası sahəsində fəaliyyət göstərən Midea şirkəti DeepSeek-i kondisionerlərinə inteqrasiya edib. Bu cihazlar səsli əmrlərə reaksiya verir, istifadəçinin əhvalını analiz edir və hətta söhbət aparmaq qabiliyyətinə malikdirlər. Eyni zamanda süni zəka dəstəyi ilə təchiz olunmuş ağıllı tozsoranlar və soyuducular da satışa çıxarılıb.
         Bununla belə, ekspertlər bu cihazların hələ ideal olmamasını etiraf edirlər, lakin texnologiyaların təkmilləşməsi ilə onların effektivliyinin artacağı gözlənilir. Çinin tibb müəssisələri də DeepSeek-dən istifadəyə maraq göstərib. Təxminən 100 xəstəxana süni zəka sistemindən diaqnostika, tibbi görüntülərin analizi və sənədlərin idarə edilməsi üçün aktiv istifadə edir. Lakin bəzi sahələrdə süni zəkadan istifadəyə məhdudiyyətlər qoyulub. Məsələn, fevral ayında Hunan əyalətində süni zəkanın avtomatik reseptlər yaratması qadağan edilib. Həmçinin, Çinin Milli Səhiyyə Komissiyası həkimlərin süni zəka ilə əvəz edilməsinə icazə verməyəcəyini açıqlayıb.
         Dövlət qurumları da tədricən DeepSeek-ə keçir. Məsələn, Şençjenin Cənub Texnologiya Mərkəzi bu texnologiyanı sənəd dövriyyəsini optimallaşdırmaq üçün ilk tətbiq edənlərdən biri olub. Nəticədə sənədlərin yazılma dəqiqliyi 95%-ə çatıb, onların emal müddəti isə 90% azalıb. Süni zəka hüquq-mühafizə orqanlarına da kömək edib. Bir gecə şəhərdə 5 sahibsiz atın gəzdiyinə dair siqnal daxil olduqda, polis yaxınlıqdakı atçılıq fermaları haqqında məlumat almaq üçün çat-botdan istifadə edib.
         DeepSeek-in verdiyi operativ cavab sayəsində polis əməkdaşları tez bir zamanda təsdiqlənmiş ünvanları yoxlayaraq atların sahibini tapa bilib. Ekspertlər vurğulayırlar ki, DeepSeek-in dövlət qurumlarında tətbiqi təkcə effektivlik məsələsi deyil, həm də hökumətin strateji hədəflərinə dəstək nümayişidir. "Çin uzun müddətdir ki, süni zəkanı gələcək inkişaf üçün əsas istiqamət kimi müəyyən edib və bu sahədə dünya lideri olmağa çalışır" - deyə Pekində yerləşən Anbound analitik mərkəzinin analitiki Chen Li bildirib. Eyni zamanda, DeepSeek Çin texnoloji vətənpərvərliyinin simvoluna çevrilir və biznes, dövlət və cəmiyyətin səylərini birləşdirir.
    Mənbə: Rest of World
    Paylaş
    Bənzər xəbərlər
    openai-abs-da-deepseek-in-qadagan-edilmesini-teklif-edib
    Proqram Təminatı

    OpenAI ABŞ-da DeepSeek-in qadağan edilməsini təklif edib

    Çində qabaqcıl texnologiyalarla bağlı tez-tez rast gəlinən hallar kimi, DeepSeek-in texnologiyaları ölkə xaricində tez bir zamanda əleyhdarlarını tapıb. ABŞ-ın OpenAI şirkəti rəqabətə girmək əvəzinə, təkcə DeepSeek-in deyil, həm də Çin və digər "dost olmayan" ölkələrin dəstəklədiyi bütün şirkətlərin böyük dil modellərinin ABŞ-da qadağan edilməsini təklif edib.
    deepseek-emekdaslarinin-cini-terk-etmeleri-mehdudlasdirilib
    Tech-Biznes

    DeepSeek əməkdaşlarının Çini tərk etmələri məhdudlaşdırılıb

    Yanvar ayında DeepSeek süni zəka startapının sürətli və səs-küylü uğuru Çin hakimiyyətinin şirkəti daha yaxından izləməsinə səbəb olub.
    meshur-cat-botlardan-hansilari-daha-cox-konfidensial-melumat-yigir
    Proqram Təminatı

    Məşhur çat-botlardan hansıları daha çox konfidensial məlumat yığır?

    Çin mənşəli süni zəka modelləri, məsələn, DeepSeek ətrafında artan narahatlıqlara baxmayaraq, yeni bir araşdırma göstərir ki, bu qorxular bəlkə də şişirdilmişdir - ən azından məxfilik baxımından.
    deepseek-ucun-arasdirma-aparmaq-gelir-elde-etmekden-daha-vacib-olub
    Süni İntellekt

    DeepSeek üçün araşdırma aparmaq gəlir əldə etməkdən daha vacib olub

    Çinin süni intellekt sahəsində fəaliyyət göstərən DeepSeek startapı gəlir əldə etməkdən daha çox elmi tədqiqatlara diqqət yetirir. Şirkətin qurucusu, milyarder Liang Wenfeng, Silikon Vadisindəki rəqiblərin strategiyasını izləmək əvəzinə, fərqli bir yanaşma seçib.
    deepseek-gelirden-cox-umumi-suni-zekanin-yaradilmasina-istiqametlenib
    Süni İntellekt

    DeepSeek gəlirdən çox ümumi süni zəkanın yaradılmasına istiqamətlənib

    Çinin DeepSeek startapı, "məntiqi düşünmə" qabiliyyəti ilə tanınan R1 adlı süni zəka modeli sayəsində qlobal məşhurluq qazansa da, elmi araşdırmaları maliyyə qazancından üstün tutur.