Daha bir dövrün sonu: Skype yaxın zamanda fəaliyyətini dayandıracaq

     Yaxın aylarda Microsoft-un Skype-ı bağlamağa hazırlaşdığı ehtimal olunur. Tətbiqin sonuncu ön baxış versiyasının kodunda gizli bir sətir aşkar edilib: "May ayından etibarən Skype əlçatan olmayacaq. Zəng etmək və ünsiyyəti davam etdirmək üçün Teams-dən istifadə edin". Bu barədə XDA Developers resursu məlumat verib. Hazırda əlavə təfərrüatlar məlum deyil, lakin görünən odur ki, Skype-ın dövrü sona yaxınlaşır. Skype 2003-cü ildə yaradılıb və populyarlığının zirvəsində VoIP zəngləri və mesajlaşma üçün ən məşhur platformalardan biri olub. 2011-ci ildə Microsoft Skype-ı 8.5 milyard dollara aldı və onu Windows, Windows Phone, hətta Xbox kimi müxtəlif məhsullarına inteqrasiya etməyə çalışdı.

     Son 10 il ərzində Microsoft Skype-ı bir neçə dəfə yeniləyib və dəyişdirib. Hətta onu bölərək Windows 10 Mobile-da "Telefon" və "Mesajlar" tətbiqlərinə daxil etməyə cəhd edib və bu xidməti Apple iMessage-ə rəqib kimi təqdim etməyə çalışıb. Lakin son illərdə Microsoft demək olar ki, Skype-ı tamamilə unudub. Pandemiya dövründə şirkət onu həqiqətən rəqabətədavamlı hala gətirə bilmədi və bu səbəbdən istifadəçilərin gözündə Skype ikinci plana keçdi. Əksər insanlar Telegram, WhatsApp, iMessage və Discord kimi daha müasir platformalara üstünlük verməyə başladılar.

     Microsoft isə Skype-dan əldə etdiyi təcrübəni Teams kimi populyar korporativ mesajlaşma xidmətinin inkişafında istifadə etdi. Bununla belə, bu iki xidmət arasında əhəmiyyətli fərqlər mövcuddur. İndi şirkət, görünür, Skype istifadəçilərini Teams-ə keçməyə təşviq etməyə çalışacaq. Lakin hazırda köhnə platformadan əsasən fərdi istifadəçilər yararlanır. Mövcud vəziyyətində Skype rəqiblərindən xeyli geri qalır. O, Windows üçün yavaş işləyən veb-tətbiqdir və müxtəlif cihazlar arasında mesajların və bildirişlərin sinxronizasiyasını çətinliklə yerinə yetirir. Üstəlik, son illərdə Microsoft-un aktiv şəkildə inkişaf etdirdiyi ARM prosessorlarının dəstəyi belə yoxdur.

     Buna baxmayaraq, Microsoft ara-sıra bu ölməkdə olan layihəyə diqqət yetirib. Skype Clips adlı qısa video mesaj göndərmə funksiyası, Copilot süni zəkasına çıxış, özünə mesaj göndərmə imkanı və rəqib platformalara qarşı mübarizə aparmaq üçün yenilənmiş mobil interfeys istifadəyə verilib. Lakin görünür ki, bütün bu addımlar Skype-ın vəziyyətini yaxşılaşdırmağa kömək etməyib. Skype-ın son böyük yeniləməsi may 2024-cü ildə buraxılıb. Dekabr ayında isə istifadəçilərə Skype-dan kənar nömrələrə zəng etməyə imkan verən Skype Number xidməti dayandırılıb. Hələlik Microsoft tərəfindən Skype-ın bağlanması ilə bağlı rəsmi açıqlama verilməyib.

Mənbə: XDA-developers

Bənzər xəbərlər

Təhlükəsizlik

Microsoft süni zəka vasitəsilə intim kontentlər hazırlamış haker qruplaşmasını çökdürüb

Microsoft, ABŞ və digər ölkələrdən olan hakerlərin süni zəka əsaslı generativ alətlərin məhdudiyyətlərini aşaraq zərərli kontent yaratdıqlarını aşkar edib. Bu fəaliyyətə Azure bulud xidmətində OpenAI modellərindən istifadə edən hakerlər də daxildir.

Proqram Təminatı

Microsoft Office tətbiqlərinin pulsuz versiyalarını istifadəyə verib

Microsoft heç bir anons etmədən Windows üçün Office tətbiqlərinin pulsuz versiyasını təqdim edib. Bu versiya Microsoft 365 abunəliyi və ya lisenziya açarı olmadan Word, Excel və PowerPoint sənədlərinin yaradılmasına və redaktə edilməsinə imkan verir.

Proqram Təminatı

Windows 11-in Start menyusunun yeni dizaynı sərgilənib

Microsoft Windows 11-də Start menyusunun tezliklə dəyişəcəyini təsdiqləyib və tətbiqlərin siyahısının təşkilinə dair iki yeni variant təqdim edib.

Süni İntellekt

Microsoft video oyunların hazırlanması prosesində süni zəkadan istifadə etmək istəyir

Süni zəkanın vahid dünyaya və qaydalara malik video oyunlar yaratmaq üçün istifadəsi oyun dizaynerləri üçün faydalı ola bilər. Microsoft tərəfindən yaradılmış Muse adlı süni zəka modeli video oyunlardan realistik səhnələr yarada bilir.

Süni İntellekt

Microsoft video oyunun gameplay hissələrini tərtib edə bilən süni zəka modelini yaradıb

Microsoft açıqlayıb ki, Microsoft Research tədqiqat bölməsi və Ninja Theory studiyasının (Senua's Saga: Hellblade II) tərtibatçıları süni zəka sahəsində əhəmiyyətli bir nailiyyət əldə ediblər.