Gemini 2.5 Pro və Gemini 2.5 Flash-in stabil versiyaları istifadəyə verilib

     Google, Gemini 2.5 Pro və Gemini 2.5 Flash adlı süni zəka modellərinin stabil versiyalarının istifadəyə verildiyini elan edib. Bununla yanaşı, şirkət yeni büdcəli süni zəka modeli Gemini 2.5 Flash-Lite-ı da təqdim edib. Əsas yeniliklər tərtibatçılar üçün xərclərin azaldılmasına və modellərin sabitliyinin artırılmasına yönəlib. Yüksək performanslı Gemini 2.5 Pro artıq ön baxış mərhələsindən çıxıb və kommersiya istifadəsi üçün tam hazırdır. Gemini 2.5 modeli 2025-ci ilin əvvəlində təqdim edilmişdi və əvvəlki versiyalarla müqayisədə ciddi irəliləyiş göstərmişdi. Bu da Google ilə OpenAI arasında rəqabəti daha da gücləndirib.

     Gemini 2.5 Flash modeli isə artıq apreldə ön baxış mərhələsini keçmişdi, lakin Gemini 2.5 Pro bir qədər gecikmişdi. Gemini 2.5 seriyasına aid bütün modellər süni zəkanın cavab büdcəsinin tənzimlənməsini dəstəkləyir ki, bu da tərtibatçılara xərclərinə nəzarət etməyə imkan verir. Ən sərfəli variant olaraq Google, hazırda preview statusunda olan yüngülləşdirilmiş Gemini 2.5 Flash-Lite modelini təklif edir. 2.5 Flash versiyası ilə müqayisədə, Flash-Lite modelində mətn, şəkil və video emalı 3 dəfə daha ucuz başa gəlir, cavabların generasiyası isə 6 dəfədən çox daha qənaətlidir.

     Flash-Lite modeli son istifadəçilər üçün nəzərdə tutulmuş Gemini tətbiqində yer almayacaq, çünki əsasən istifadə sayına (token miqdarına) əsasən ödəniş edən tərtibatçılar üçün nəzərdə tutulub. Bundan əlavə, Google Flash və Flash-Lite modellərini öz axtarış sisteminə inteqrasiya etməyə başlayıb. Şirkət nümayəndəsi bildirib ki, bu modellərin uyğunlaşdırılmış versiyaları artıq “Süni zəka icmallarında” və AI Mode adlı çat-bot rejimində istifadə olunur. Sistemin seçimi sorğunun mürəkkəbliyindən asılı olaraq avtomatik həyata keçirilir: Mürəkkəb vəzifələr üçün Gemini 2.5 Pro, daha sadə tapşırıqlar üçün isə Flash və ya Flash-Lite modeli işə düşür.

     Flash-Lite modelinin ilkin (preview) versiyası artıq Google AI Studio və Vertex AI platformaları vasitəsilə tərtibatçılar üçün əlçatandır və bu, stabil versiyada təqdim olunan Gemini 2.5 Flash və 2.5 Pro modelləri ilə yanaşı təklif olunur. İstifadəçilər üçün nəzərdə tutulmuş Gemini tətbiqində isə ciddi dəyişikliklər gözlənilmir, çünki modelin yekun versiyaları artıq əvvəlki yeniləmələrdə tətbiq edilib. 2.5 Pro versiyasının üzərindən preview etiketi götürüləcək - bu, 1 ay əvvəl Flash modelində də baş vermişdi. Ödənişsiz istifadəçilər hələ də 2.5 Pro modelinə məhdud şəkildə çıxış əldə edəcəklər. Gemini Pro abunəçiləri isə bu modeldən gündəlik 100 dəfə istifadə edə biləcəklər. Ən yüksək səviyyəli çıxış hüququ isə AI Ultra abunəçilərinə məxsus olaraq qalır.