Google Android-də təsdiqlənməmiş tərtibatçıların tətbiqlərini qadağan edəcək

     Google şirkəti Android-də zərərli tətbiqlər və maliyyə fırıldaqları ilə mübarizəni davam etdirir. Bu fəaliyyət çərçivəsində şirkət gələn ildən etibarən verifikasiya keçməyən tərtibatçıların tətbiqlərinin quraşdırılmasını qadağan etməyi planlaşdırır. Bu tələb “Android sertifikatlı cihazlara” şamil olunacaq, hansı ki, onlarda Play Protect qorunması mövcuddur və Google tətbiqləri əvvəlcədən quraşdırılıb. Oxşar qaydalar 2023-cü ildən etibarən Google Play Market-də qüvvədədir, lakin indi Google daha irəli getmək qərarına gəlib. Yeni tələb həmçinin üçüncü tərəf tətbiq mağazalarına, eləcə də xarici mənbələrdən yüklənən APK fayllarına da şamil olunacaq.

     “Təsəvvür edin ki, bu, hava limanında sərnişinin şəxsiyyətini müəyyənləşdirmək üçün aparılan yoxlamadır, amma baqajın yoxlanılması ilə bağlı deyil. Biz kimin tərtibatçı olduğunu yoxlayacağıq, amma onların tətbiqlərinin məzmununu və ya mənşəyini araşdırmayacağıq” - deyə Google-un açıqlamasında deyilir. Şirkət saxta tətbiqlərlə mübarizə aparmağı və ilkini sildikdən sonra digər zərərli tətbiqləri yenidən yaymağa çalışan pis niyyətli şəxslərin işini çətinləşdirməyi planlaşdırır. Google-un son təhlili göstərib ki, üçüncü tərəf mənbələrdə yerləşdirilən zərərli tətbiqlərin sayı Play Market-də yerləşdirilənlərdən təxminən 50 dəfə çoxdur. Google bildirib ki, tərtibatçılar istifadəçilər arasında tətbiqlərini üçüncü tərəf mənbələri vasitəsilə yaymaqda və ya bunun üçün istədikləri hər hansı tətbiq mağazasından istifadə etməkdə eyni azadlığa sahib olacaqlar.

      Bu tələblə uyğun olaraq, Google yalnız Play Market-dən kənarda məhsullarını yayan Android tərtibatçıları üçün yeni bir konsol istifadəyə verəcək. Həvəskarlar üçün isə kommersiya variantından fərqli ayrıca bir iş prosesi yaradılacaq. Play Market vasitəsilə tətbiqlər yayan tərtibatçılar böyük ehtimalla artıq Play Console-də mövcud proses vasitəsilə verifikasiya tələblərini yerinə yetiriblər. Yeni verifikasiya prosesi bu ilin oktyabrında test rejimində işə salınacaq və 2026-cı ilin martında hamı üçün əlçatan olacaq. Yeni tələb 2026-cı ilin sentyabrında Braziliya, İndoneziya, Sinqapur və Taylandda qüvvəyə minəcək. 2027-ci ildən isə bu verifikasiya sistemi bütün dünyada məcburi olacaq.