Google Chrome üçün yeni araşdırma və öyrənmə funksiyalarını təqdim etdi

    “Google” mürəkkəb mövzuları araşdırmağı və öyrənməyi asanlaşdıran yeni “Chrome” funksiyalarını yaymağa başlayıb. Əsas yenilik cihazlar arasında göndərilən tabın əvvəlki vəziyyətini yadda saxlamasıdır. Brauzer səhifədə haraya qədər baxıldığını xatırlayır və digər cihazda həmin hissəni açır. Yarımçıq doldurulmuş formalar da saxlanır. Beləliklə, telefonda başladığınız işi kompüterdə və ya əksinə davam etdirə bilərsiniz.

    Masaüstü versiyada səhifəni göndərmək üçün 3 nöqtəli əsas menyunu açıb “Cast, Save, and Share” bölməsini seçmək lazımdır. Bu qısayolu “Customize Chrome” bölməsindəki “Toolbar” ayarı ilə alətlər panelinə də əlavə etmək olur. “Android” versiyasında funksiya “Chrome”un paylaşma menyusunda görünür.

    “Gemini in Chrome” artıq daha çox media növü ilə işləyir. Süni intellekt sənədləri, veb səhifələri və “YouTube” videolarını təhlil edib qısa məzmun hazırlaya, həmçinin məlumatları əyani şəkildə göstərə bilir. Sistem indi podkastları, səs yazılarını və YouTube xaricində yerləşdirilən videoları da təhlil edir. Fayl açıldıqdan sonra “Gemini” əsas məqamları seçə, konkret məlumatı tapa və anlaşılması çətin hissələri izah edə bilir.

    Digər yenilik açıq tabdakı material əsasında interaktiv testlər hazırlayır. Funksiya “Google Docs” sənədləri, “YouTube” videoları, elmi məqalələr və başqa məzmunlarla işləyir. Testlər əsas anlayışlara fokuslanır və mövzunu nə qədər başa düşdüyünüzü yoxlamağa kömək edir. Yenilik hazırda ABŞ və Hindistanda masaüstü versiyada ingilis dilində yayılır. Digər bölgələrə və mobil cihazlara yaxın aylarda çatacaq.

    “Google” təhsil və araşdırma üçün “Chrome”da olan digər alətləri də xatırladıb. Brauzerdə tabları şaquli və ya üfüqi göstərmək, qruplaşdırmaq və ekranı “Split View” ilə 2 hissəyə bölmək olur. Oxu rejimi diqqəti mətndə saxlamağa kömək edir. Səslə oxuma funksiyası ilə məzmunu ekrana baxmadan dinləmək olar.