Google Gemini-nin iPhone-a inteqrasiyası üçün danışıqlar aparılır

     Google-un baş direktoru Sundar Pichai bildirib ki, şirkət Gemini süni zəka modelinin iPhone cihazlarına inteqrasiyası ilə bağlı Apple ilə razılaşmaya yaxınlaşır. Bu inteqrasiya Siri-yə daha mürəkkəb suallara cavab vermək üçün süni zəkanın geniş imkanlarından istifadə etməyə imkan verəcək. Hələ keçən ilin iyun ayında Apple-ın baş vitse-prezidenti Craig Federighi bu cür birgə işin mümkünlüyünə eyham vuraraq demişdi ki, onlar gələcəkdə istifadəçilərin Google Gemini daxil olmaqla müxtəlif süni zəka modelləri arasında seçim imkanı olmasını istəyirlər.

     Hazırda isə Apple Intelligence sisteminə yalnız OpenAI tərəfindən hazırlanmış çat-bot inteqrasiya olunub - bu sistem mürəkkəb sorğuları öz imkanlarını aşdıqda ChatGPT-yə yönləndirir. Pichai təsdiqləyib ki, inteqrasiya məsələsini Apple-ın rəhbəri Tim Cook ilə müzakirə edib. Öz növbəsində, Tim Cook da Gemini-nin inkişafı və təşviqi planları ilə maraqlanıb və əlavə edib ki, Apple şirkəti bu il ərzində Apple Intelligence sisteminə daha çox üçüncü tərəf süni zəka modelini əlavə etməyi planlaşdırır. Əgər razılaşma baş tutarsa (təxminən 2025-ci ilin sonuna qədər), Gemini Apple ekosistemində mövcud olacaq ikinci üçüncü tərəf süni zəka sistemi olacaq və istifadəçilərə OpenAI və Google texnologiyaları arasında seçim imkanı yaradacaq. Bu isə süni zəka sahəsində rəqabəti daha da gücləndirəcək.

Mənbə: The Verge