Huawei HarmonyOS-in kompüterlər üçün versiyası anons edilib

     Huawei şirkəti HarmonyOS Computer Technology and Ecosystem Communication Conference adlı konfrans keçirib və bu konfrans çərçivəsində geniş ictimaiyyətə HarmonyOS əməliyyat sisteminin kompüterlər üçün nəzərdə tutulmuş versiyası rəsmi şəkildə anons olunub. Beləliklə, Çin şirkəti smartfonlar, planşetlər, ağıllı saatlar və ağıllı ekranlardan sonra artıq kompüterləri də əhatə etməklə HarmonyOS dövrünə tam şəkildə keçmiş oldu. Mobil versiyada olduğu kimi, kompüterlər üçün HarmonyOS da sıfırdan hazırlanıb. Şirkətin verdiyi məlumata əsasən, bu əməliyyat sistemi Harmony bazası adlandırılan təməl üzərində qurulub.

     Bu baza Harmony nüvəsi, Ark mühərriki, StarShield təhlükəsizlik arxitekturası, ArkTS, ArkUI və DevCo adlı tərtibatçılıq alətlərini əhatə edir. Bütün bunlar HarmonyOS-un Android və Windows-dan asılı olmayan müstəqil və tamhüquqlu əməliyyat sisteminə çevrilməsi üçün nəzərdə tutulub. Huawei bu addımı ABŞ-ın tətbiq etdiyi ticarət məhdudiyyətlərinə cavab olaraq atmağa məcbur qalıb. HarmonyOS təqdimatında istifadəçi təhlükəsizliyi və məxfiliyi əsas mövzulardan biri olub. Belə ki, kompüterlər üçün HarmonyOS real adla tərtibatçı autentifikasiyası funksiyasını, tətbiq mağazasında imzaların yoxlanılmasını, ekran yazısı və ekran görüntülərinin yaradılması üçün ciddi icazə mexanizmini dəstəkləyir.

     Əlavə olaraq, sistem üzrə kamera və mikrofonun deaktiv edildiyi, həmçinin yerləşmə məlumatlarına çıxışın bloklandığı gücləndirilmiş məxfilik səviyyəsi də nəzərdə tutulub. Bundan başqa, tam disk şifrələməsi dəstəklənir. Bu o deməkdir ki, yaddaş cihazı kompüterdən çıxarılıb başqa bir qurğuya qoşulsa belə, oradakı məlumatlar istifadəçi cihazın ekran kilidini açana qədər əlçatmaz qalacaq. Fərqli sənəd tipləri ilə işləmək üçün HarmonyOS Office istifadə etmək təklif olunur. Bu platforma müxtəlif cihazlarda fasiləsiz əməkdaşlıq, vahid hesab sistemi, bir neçə cihaz arasında sinxronizasiya və süni zəka əsaslı funksiyalara çıxış imkanı yaradır.

     Korporativ müştərilər üçün Huawei HarmonyOS əsasında biznes yönümlü həllər təqdim edəcək və bu həllər iki bulud platformasını tamamlayacaq: Enterprise Application Center və Enterprise Business Deployment Cloud. Keçirilmiş təqdimat çərçivəsində Huawei təsdiqləyib ki, kompüterlər üçün HarmonyOS-in rəsmi təqdimatı 19 may tarixində baş tutacaq. Hazırda bu platformanın praktikada necə görünəcəyi, ilk növbədə hansı cihazlarda istifadəyə veriləcəyi və üçüncü tərəf kompüter istehsalçılarının onu tətbiq edib-etməyəcəyi hələ ki məlum deyil.

Mənbə: Gizmochina