iOS 26-nın köhnə iPhone-larda çalışmayacaq funksiyaları açıqlanıb

     Bu həftə Apple iPhone üçün bir sıra yeniliklər gətirəcək iOS 26 əməliyyat sistemini təqdim etdi. Ən diqqətçəkən dəyişiklik Liquid Glass üslubunda olan yenilənmiş dizayn olacaq və bu dizayn yeni platformanı dəstəkləyən bütün iPhone modellərində tətbiq olunacaq. Bununla yanaşı, bəzi funksiyalar yalnız Apple Intelligence dəstəyi olan yeni iPhone modellərində işləyəcək. Visual Intelligence adlı funksiyanın ekran görüntülərini analiz etməsi yalnız iPhone 15 Pro və daha yeni modellərdə dəstəklənəcək. Qeyd edək ki, Visual Intelligence ötən il iPhone 16 seriyası üçün xüsusi kamera funksiyası kimi debüt etmişdi. İndi isə bu funksiya əvvəlki nəsil bəzi modellərdə də əlçatan olacaq. iOS 26-da ekran görüntüsü çəkildikdən sonra süni zəka vasitəsilə həmin görüntüdə nə əks olunduğu analiz edilə biləcək.

     Bu funksiya alış-veriş zamanı, təqvimə tədbir əlavə etmək və digər bir çox hallarda faydalı olacaq. Live Translation funksiyası yalnız iPhone 15 Pro və daha yeni modellərdə FaceTime, Messages və Phone tətbiqlərində əlçatan olacaq. Apple-ın bu 3 əsas tətbiqində real vaxtda tərcümə imkanı dil baryeri problemini əhəmiyyətli dərəcədə azaldacaq. Messages tətbiqində tərcümə mətn yazıldığı anda görünür, FaceTime zamanı altyazılar göstərilir, telefon zəngi zamanı isə danışıq ərzində tərcümə səsli şəkildə təqdim olunur. Kilid ekranında 3D effekti iPhone 12 və daha yeni modellərdə əlçatandır. Liquid Glass dizaynına əlavə olaraq, kilid ekranında əyləncəli üçölçülü effekt də təqdim olunub: Saatlar fotonun kompozisiyasına uyğun yerləşdirilir və ekran çevrildikdə bu effekt dinamik şəkildə dəyişir.

     Shortcuts vasitəsilə süni zəka funksiyalarının işə salınması - yalnız iPhone 15 Pro və daha yeni modellərdə mümkündür. iPhone-da bir neçə əməliyyatı avtomatlaşdırmaq üçün nəzərdə tutulan Shortcuts tətbiqi artıq süni zəka funksiyalarını da dəstəkləyir: Şəkil generasiyası, mətnlərin xülasəsinin hazırlanması və modelə sual vermək imkanı kimi funksiyalar əlavə olunub. Apple Intelligence funksiyaları Reminders tətbiqində - yalnız iPhone 15 Pro və daha yeni modellərdə mövcuddur. iOS 26-da Reminders tətbiqi süni zəka dəstəyi qazanıb. Messages, elektron poçt və digər tətbiqlərdəki mətnlər əsasında sistem avtomatik olaraq yeni tapşırıqlar yaratmağı təklif edəcək. Eyni zamanda, süni zəka Reminders tətbiqində tapşırıqları avtomatik şəkildə bölmələrə ayıraraq təşkil edə biləcək.

     Apple Wallet-də sifarişlərin izlənməsi iPhone 15 Pro və daha yeni modellərdə dəstəklənir. Apple Wallet tətbiqi bir neçə ildir sifariş izləmə funksiyasını təqdim etsə də, mağazalar bu funksiyanı nadir hallarda dəstəklədiyindən iPhone istifadəçiləri ondan az istifadə edirlər. iOS 26-da süni zəka istifadəçinin e-poçt qutusundakı məktublar əsasında sifarişləri özü izləyə biləcək. Bu isə funksiyanın real istifadəsini mümkün edəcək və mağazaların öz sistemlərini Apple ilə inteqrasiya etməsinə ehtiyac qalmayacaq. Yenilənmiş Genmoji və Image Playground funksiyaları yalnız iPhone 15 Pro və daha yeni modellərdə mövcuddur. iOS 26-da Genmoji funksiyası iki mövcud emojini birləşdirməklə yeni emojilər yaratmağa və onlara mətn təsvirləri əlavə etməyə imkan verir.

     İstifadəçi personaj üçün geyim, saç düzümü və digər detalları seçə bilər. Image Playground funksiyası ChatGPT ilə birgə şəkil generasiyasını dəstəkləyir. Burada “Anime”, “Yağlı boya”, “Çap”, “Vektor” və “Akvarel” kimi üslublar mövcuddur. “İstənilən üslub” adlı seçim vasitəsilə isə istifadəçi yaratmaq istədiyi şəkli istədiyi kimi təsvir edə bilər. Messages tətbiqində fonlar və sorğular iPhone 15 Pro və daha yeni modellərdə dəstəklənir. Messages tətbiqində əvvəlcədən hazırlanmış fonlardan birini seçmək və ya Image Playground vasitəsilə öz fonunu yaratmaq mümkündür. Sorğu funksiyası isə bütün iPhone modellərində əlçatandır, lakin Apple Intelligence mətn kontekstinə əsaslanaraq cavab variantlarını avtomatik şəkildə təklif edə bilər.