iOS klaviaturasında 100 mindən çox söz və ifadə təklif olunmur

    Tədqiqatçı Derik Kauffman “iOS” klaviaturasının avtomatik tamamlama və sürüşdürərək yazma funksiyalarında bloklanan 100 mindən çox söz və ifadə aşkarlayıb. Siyahı bütün əsas dilləri əhatə edir. Sistem bu söz və ifadələri təklif kimi göstərmir, amma istifadəçi hərfləri ayrı-ayrılıqda daxil edərək onları yenə də yaza bilir.

    Məhdudiyyət sürüşdürərək yazarkən daha aydın görünür. Bu üsulda barmağı ekrandan qaldırmadan hərflərin üzərində hərəkət etdirib söz yazmaq olur. Məsələn, “left wing conspiracy” ifadəsini daxil etdikdə klaviatura onu “left wrong conspiracy” kimi dəyişə bilər. Hərfləri adi qaydada yazanda həmin ifadəni daxil etmək olur.

    Siyahının böyük hissəsi təhqir, söyüş, cinsi məzmun, narkotik və digər həssas mövzularla bağlıdır. “illegal immigrant”, “dictator Trump”, “sleepy Joe”, “covid was a hoax” və “left wing conspiracy” kimi siyasi ifadələr də siyahıya daxildir. “Santa isn’t real” və “iMessage isn’t working” kimi daha zərərsiz cümlələr də bloklanıb.

    Kauffman seçimlər arasında uyğunsuzluqlar da tapıb. Məsələn, “bad girl” bloklansa da, “bad boy” üçün belə məhdudiyyət yoxdur. Tədqiqatçı siyahını “OpenAI Codex” və “Anthropic Claude Code” alətlərinin köməyi ilə üzə çıxarıb. Məlumat “iOS” daxilində sözlərin kodlaşdırıldığı xüsusi cədvəldə saxlanılıb, daha sonra yenidən mətnə çevrilib.

    Başqa bir tədqiqatçı da eyni siyahını müstəqil şəkildə əldə edib. “Apple”a görə, klaviatura uyğunsuz və təhqiramiz ola biləcək təklifləri göstərməmək üçün belə hazırlanıb. Bununla belə, “iPhone” istifadəçiləri istədikləri mətni əl ilə yaza və klaviaturanın təklifini dəyişə bilirlər. Yəni siyahı həmin sözlərin yazılmasını tam qadağan etmir.