LibreOffice ofis paketinə yaxın vaxtlarda AI əlavə edilməyəcək

    “LibreOffice” proqramını hazırlayan, kommersiya məqsədi daşımayan “The Document Foundation” yaxın vaxtlarda ofis paketinə süni intellekt funksiyaları əlavə etməyəcək. Avqustun sonunda çıxan son versiyada da mətn və başqa məzmun yaradan generativ AI funksiyalarının olmadığı vurğulanmışdı. Qurum bunu çatışmazlıq yox, istifadəçi məlumatlarını qorumaq üçün şüurlu seçim sayır.

    Bu qərarın əsas məqsədi sənədlərin emal üçün uzaq serverlərə göndərilməsinin qarşısını almaqdır. “LibreOffice” standart quraşdırmada internetsiz işləyir və sənədləri cihazdan kənara ötürmür. Bir çox AI xidməti məlumatları istifadəçinin nəzarətindən kənar serverlərdə emal edir. Qurum həmin məlumatların harada və nə qədər saxlanması ilə bağlı riski qəbul etmir.

    “The Document Foundation” deyir ki, “LibreOffice” proqramından on milyonlarla insan və təşkilat istifadə edir. Məxfi, hüquqi sirr sayılan və ya şəxsi məlumatlarla işləyən qurumlar sənədlərin hara göndərildiyini dəqiq bilməlidir. Tərtibatçının fikrincə, ən etibarlı zəmanət məlumatların istifadəçinin kompüterindən kənara çıxmamasıdır.

    Bununla belə, süni intellektdən yararlanmaq istəyənlər üçün seçim tam bağlanmır. İstifadəçilər “LibreOffice” əlavələrini quraşdırıb sənəd redaktorunu birbaşa cihazda işləyən yerli AI modellərinə qoşa bilərlər. Beləliklə, bu funksiya standart paketə daxil edilmir və seçim istifadəçinin özündə qalır. Proqramın əsas versiyası da süni intellekt xidmətlərindən uzaq saxlanılır.

    Quruma görə, hazırda məlumatları cihazda saxlayan, yalnız 1 AI xidmətindən asılı olmayan və digər tələblərə cavab verən uyğun inteqrasiya yoxdur. Buna görə bu qərar texnologiyadan birdəfəlik imtina demək deyil. Şərtlər dəyişənədək standart quraşdırmada heç bir AI funksiyası olmayacaq. “The Document Foundation” texnologiyanın inkişafını izləyəcək.