Microsoft 365 ofis tətbiqlərinə Anthropic-in süni intellekt modelləri inteqrasiya edilib

     Microsoft şirkəti Anthropic-in Claude Sonnet 4 və Claude Opus 4.1 süni intellekt modellərini öz ofis tətbiqlərinə - Microsoft 365 Copilot-a inteqrasiya etməyə başlayıb. Bu, modellərin seçimini genişləndirəcək və müştərilərə Anthropic texnologiyalarını həm Researcher agentində, həm də Microsoft Copilot Studio-da süni intellekt agentləri yaradarkən istifadə etməyə imkan verəcək. Bu gündən etibarən Microsoft 365 Copilot istifadəçiləri Frontier tətbiqi vasitəsilə Anthropic modellərini qoşmaq imkanı əldə ediblər. Researcher tətbiqində “Try Claude” düyməsi peyda olub və bu, sistemi OpenAI modellərindən Claude Opus 4.1-ə keçirməyə imkan verir. Qoşulduqdan sonra isə bir alət daxilində fərqli süni intellekt mühərrikləri arasında asanlıqla keçid etmək mümkündür.

     Claude Sonnet 4 və Claude Opus 4.1 modelləri həmçinin süni intellekt agentlərinin yaradılması və idarə olunması üçün platforma olan Microsoft Copilot Studio-da da əlçatan olacaq. Microsoft-un Copilot for Business and Industries bölməsinin prezidenti Charles Lamanna-nın sözlərinə görə, bu, dərin analiz, iş proseslərinin avtomatlaşdırılması və çevik agent tapşırıqlarının yerinə yetirilməsi üçün alətlərin hazırlanmasına imkan yaradacaq. Bundan əlavə, Copilot Studio-da Anthropic, OpenAI və Azure model kataloqunda təqdim olunan digər təchizatçılardan modelləri birləşdirmək mümkün olacaq. Qeyd olunmalıdır ki, inteqrasiyaya baxmayaraq, Anthropic modellərinin özü Microsoft-un əsas bulud rəqibi olan Amazon Web Services infrastrukturu üzərində yerləşdirilməyə davam edəcək.

     Microsoft bu süni intellektlərə Anthropic-in açıq API-si vasitəsilə standart şəkildə çıxış təmin edəcək. Bununla belə, şirkət daha əvvəl Grok 3 modelini Azure buludunda yerləşdirmək üçün xAI ilə müqavilə imzalamışdı və gələcəkdə Anthropic ilə də analoji sazişin bağlanması istisna edilmir. Bu açıqlama Microsoft-un Visual Studio Code mühitində OpenAI-dən daha çox Anthropic-ə üstünlük verməyə başlamasından cəmi 1 həftə sonra gəlib. Orada GitHub Copilot-un ödənişli istifadəçiləri indi əsasən Claude Sonnet 4-dən istifadə edirlər. Həmçinin bildirilib ki, yaxın vaxtlarda Anthropic modelləri Excel və PowerPoint-də də tətbiq oluna bilər, çünki onlar OpenAI modelləri ilə müqayisədə daha yüksək performans göstəriblər.