Microsoft Copilot tətbiqinin iOS və iPadOS versiyaları istifadəyə verilib

     Bir neçə gün bundan öncə Microsoft şirkəti özünün süni zəka əsaslı Copilot çat-botunun Android tətbiqini istifadəyə verdi. İndi isə məlum olub ki, şirkət sözügedən tətbiqin həmçinin iOS və iPadOS versiyalarını da istifadəyə verib. Tətbiqin hər iki versiyasını artıq App Store-dan yükləmək olar. Copilot-un Android versiyasında olduğu kimi iOS və iPadOS versiyalarında da çat-bota müxtəlif sualları vermək, mətnləri və DALL-E 3 sistemi üzərində fotoları tərtib etmək olar. Pulsuz təqdim olunan ChatGPT-dən fərqli olaraq Copilot-da OpenAI şirkətinin GPT-4 sistemi istifadə edilir. Qeyd etmək lazımdır ki, Copilot-un bu platformalarda tətbiqinin istifadəyə verilməsi Bing Chat-ın Copilot-a rebrendinqinin bir hissəsidir.