Microsoft GPT-5-i artıq Copilot-a inteqrasiya edib

     OpenAI rəsmi olaraq GPT-5-i təqdim edib və Microsoft artıq onu Copilot, Microsoft 365 Copilot, Azure AI Foundry, GitHub Copilot və digər xidmətlərinə inteqrasiya etməyə başlayıb. GPT-5, sorğunun kontekstindən asılı olaraq cavabların mürəkkəblik səviyyəsini avtomatik seçə bilir və Copilot-da yeni ağıllı rejim - Smart Mode kimi istifadə olunacaq. Buraxılış Microsoft-un bir neçə platformasını əhatə edən genişmiqyaslı təqdimatın bir hissəsi olub. Yeni ağıllı rejim süni intellekt köməkçisinə modellər arasında dinamik keçid etməyə imkan verir: məntiqi cəhətdən mürəkkəb tapşırıqlar üçün GPT-5-in daha güclü versiyası, qısa sorğular üçün isə daha yüngül versiyası istifadə olunur.

     Məlumata görə, OpenAI-nin GPT-5-i pulsuz girişli istifadəçilərə təqdim etdiyi ChatGPT-dəki kimi, Microsoft ekosistemində də oxşar yanaşma tətbiq edilib. Microsoft 365 Copilot istifadəçiləri artıq bu gündən GPT-5 ilə işləyə biləcəklər. Şirkətin korporativ bloqunda qeyd olunur ki, yeni model süni intellektin mürəkkəb məsələləri analiz etmək, uzunmüddətli dialoqları dəstəkləmək və konteksti daha dəqiq nəzərə alma qabiliyyətini yaxşılaşdıracaq. Vurğulanır ki, bu təkmilləşdirmələr yüksək dəqiqlik və məntiqi ardıcıllıq tələb edən peşəkar ssenarilər üçün xüsusilə vacibdir. Yeniləmə Copilot Studio-ya da təsir edib və o da GPT-5-ə keçib.

     GitHub isə öz növbəsində GPT-5-i GitHub Copilot xidmətinin bütün ödənişli planlarına tətbiq etdiyini elan edib. OpenAI-nin yeni modeli 4 variantda təqdim olunub və hər biri müəyyən tapşırıq növləri üçün optimallaşdırılıb. Xüsusilə, GPT-5-in baza versiyası məntiqi və çoxmərhələli hesablamalar üçün nəzərdə tutulub, GPT-5-chat isə korporativ tətbiqlər üçün uyğunlaşdırılıb və konteksti nəzərə alan multimodal dialoqları dəstəkləyir. Bundan əlavə, Microsoft süni intellekt əsaslı tətbiqlərin hazırlanması və idarə olunması üçün nəzərdə tutulmuş Azure AI Foundry platforması vasitəsilə GPT-5-ə çıxışı açıb.