Nvidia DLSS 5-i yalnız bir oyunla istifadəyə verəcək

    “Nvidia” süni intellektlə oyun görüntüsünü yaxşılaşdıran “DLSS 5” texnologiyasını sentyabrın 3-də istifadəyə verəcək. Yenilik masaüstü kompüterlər və noutbuklar üçün “RTX 50” seriyalı GPU modellərində, həmçinin “GeForce Now” bulud oyun xidmətində rəsmi dəstək alacaq. İlk mərhələdə onu dəstəkləyən yeganə oyun “NBA 2K27” olacaq. Oyunun PC versiyası həmin gün Sakit okean vaxtı ilə saat 21.00-da çıxacaq.

    Mart ayında elan olunan “DLSS 5” mübahisəli təqdimatı ilə diqqət çəkmişdi. “Nvidia” onu real vaxt şüa izləmənin 2018-ci ildəki debütündən bəri kompüter qrafikasında ən mühüm yenilik adlandırmışdı. Texnologiya oyunun mənbə materialını AI ilə işləyərək kölgələri, teksturaları və başqa detalları daha real göstərir. Lakin ilk nümunələr personajların görünüşünü xeyli dəyişdirmiş, xüsusilə “Resident Evil Requiem” oyunundakı Grace Ashcroft obrazı tənqidlərə səbəb olmuşdu.

    Rəsmi buraxılış zamanı “Resident Evil Requiem”, “EA Sports FC”, “Starfield” və “Hogwarts Legacy” üçün “DLSS 5” dəstəyi olmayacaq. Bu oyunlar martdakı nümayişdə göstərilsə də, “Nvidia” texnologiyanın onlara nə vaxt çatacağını açıqlamayıb. Şirkət əvvəl təsdiqlənən planların qüvvədə olub olmadığını da dəqiqləşdirməyib. Hazırda “NBA 2K27” texnologiyanı alacağı təsdiqlənmiş yeganə oyun olaraq qalır.

    “NBA 2K27” üçün göstərilən nümunələr ilkin təqdimatdakı qədər kəskin dəyişikliklər yaratmır. Əlavə olunan kölgələr və teksturalar basketbolçuları AI karikaturasına çevirmək əvəzinə daha real göstərir. Tərtibatçılar müxtəlif tənzimləyicilər vasitəsilə effektin gücünü və səhnənin hansı hissələrinə tətbiq ediləcəyini seçə biləcəklər. “Nvidia” üzləri dəyişmədən süfrə ləvazimatlarını, yeməkləri və bitki örtüyünü yaxşılaşdırmağın mümkün olduğunu deyir.

    “DLSS 5” ilkin sınaq nümayişlərində iki “RTX 5090” qrafik kartı tələb edirdi. “Nvidia” isə tək “RTX 5060” modelinin “NBA 2K27” oyununu 1080p təsvir ölçüsündə, şüa izləmə və ultra ayarlarla işlədə bildiyini iddia edir. Bunun üçün ən sürətli oyun prosessorlarından biri və 6 qat kadr yaratma funksiyası aktiv olmalıdır. Bu rejimdə görünən hər altı kadrın yalnız birini oyun özü hazırlayır.

    Bununla belə, texnologiyanın performansa təsiri yüksəkdir. “Nvidia” “DLSS 5” aktiv olduqda sürət itkisinin 50-60 faiz təşkil etdiyini hesablayır. “Shadow of the Tomb Raider” üçün hazırlanmış rəsmi olmayan modda isə məhsuldarlıq təxminən iki dəfə azalıb. Rəsmi versiyanın nəticələri hələ tam aydın deyil, lakin modderlərin “Control” və “Skyrim” kimi köhnə oyunlarda apardığı təcrübələr effektin az miqdarda tətbiqinin daha yaxşı nəticə verdiyini göstərib.