NVIDIA şirkəti birbaşa kompüterə çalışan çat-botu istifadəyə verib (VİDEO)

Proqram Təminatı

14.02.2024

Emil

NVIDIA şirkəti Chat with RTX adlı lokal çat-botunu təqdim edib. Bu çat-bot bilavasitə istifadəçi kompüterində çalışa bilir. Chat with RTX çat-botu Mistral və Llama 2 kimi açıq mənbəli koda sahib böyük dil modelləri ilə çalışmaq üçün kompüterin sərt diskindəki özəl məlumatların istifadəsini mümkün edir. Sərt diskdəki fayllar əsasında çat-bot istifadəçinin suallarına cavab verə bilər. Sistem .txt, .pdf, .doc/.docx və .xml də daxil olmaqla müxtəlif fayl formatlarını dəstəkləyir. NVIDIA bildirib ki, özəl faylların çat-botun sisteminə yüklənməsi prosesi bir neçə saniyəyə reallaşdırılır.

Fayllar yüklənəndən sonra onların tərkib hissələrində olan məlumatlar çat-botun daha dolğun cavabları təqdim edilməsi üçün sistemə inteqrasiya edilir. Chat with RTX həmçinin videoların inteqrasiyası və Youtube videolarının analizlərini dəstəkləyir. İstifadəçi bu və ya digər videonun linkini çat-bota göndərir, çat-bot videonun tərkib hissəsini analiz edir və istifadəçiyə verilən cavablarda analiz nəticəsində əldə edilmiş məlumatlara əsaslanır. Sözügedən çat-botun çalışması üçün internetə qoşulma şərt deyil. Bu öz növbəsində məlumatların konfidensiallıqlarını təmin edir. Chat with RTX-dən istifadə etmək üçün RTX 30 seriyası və ya ondan sonrakı seriyaların videokartlarından biri və 8 GB VRAM lazımdır.

Paylaş

chat with rtx

nvidia chat with rtx

nvidia

Bənzər xəbərlər