OpenAI istifadəçi tapşırıqlarını yerinə yetirəcək süni zəka agentini təqdim edib (VİDEO)

     OpenAI yeni bir alət təqdim edib - ChatGPT Agent adlanan bu vasitə istifadəçinin kompüterində mürəkkəb və çoxmərhələli tapşırıqları onun adından yerinə yetirə bilir. Adi çat-botlardan fərqli olaraq, bu agent müstəqil şəkildə fəaliyyət göstərir, məlumatlarla işləmək, planlama aparmaq və hətta alış-veriş etmək üçün virtual mühiti istifadə edir. Layihə rəhbərləri Yash Kumar və Isa Fulford bildiriblər ki, ChatGPT Agent OpenAI tərəfindən xüsusi olaraq hazırlanmış yeni model əsasında qurulub. Bu agent istifadəçinin təqvimini analiz edə, qarşıdan gələn görüşlər üzrə xülasələr hazırlaya, ailəvi səhər yeməyi üçün reseptlər seçib məhsul sifariş edə, eləcə də rəqabət təhlili əsasında təqdimatlar yarada bilir. Model mətn və vizual brauzerlə, terminal və digər alətlərlə qarşılıqlı işləməyi tələb edən mürəkkəb tapşırıqlarda təlim alıb.

     ChatGPT Agent yalnız brauzerə deyil, bütün əməliyyat sisteminə çıxış imkanı əldə edir və optimal davranış strategiyasını müəyyən etmək üçün gücləndirici machine learning üsullarından istifadə edir. Bildirilir ki, ChatGPT Agent xüsusilə onlayn alış-veriş üçün çox əlverişlidir, çünki o, Deep Research və Operator texnologiyalarını birləşdirərək prosesi daha dəqiq və effektiv edir. Kumar bildirib ki, o, agenti öz gündəlik işlərini avtomatlaşdırmaq üçün istifadə edir - məsələn, müntəzəm parkinq rezervasiyası üçün. Agent yalnız brauzerlə deyil, kompüterin tam funksionallığı ilə işləyə bildiyi üçün alətin imkanları əhəmiyyətli dərəcədə genişlənir. Bununla belə, agent hələ ki yüksək sürətlə işləmir, çünki tərtibatçılar sürətdən çox mürəkkəb tapşırıqların optimallaşdırılmasına diqqət yetirirlər.

     Lakin Fulford izah edir ki, əgər bir tapşırığın yerinə yetirilməsi 15-30 dəqiqə çəkirsə belə, bu, həmin işi fərdi şəkildə görməkdən daha sürətlidir. Geri dönməz əməliyyatlar - məsələn, məktub göndərmək və ya bron etmək - yerinə yetirilməzdən əvvəl agent istifadəçidən təsdiq istəyəcək. Eyni zamanda, bioloji və kimyəvi imkanları yüksək olan modellər üçün tətbiq olunan təhlükəsizlik tədbirlərinə bənzər təhlükəsizlik mexanizmləri də əlavə edilib. Maliyyə əməliyyatları hələlik məhdudlaşdırılıb. Yüksək təhlükəsizlik tələb edən saytlarla işləyərkən, məsələn, bank əməliyyatları zamanı, “müşahidə rejimi” (Watch Mode) aktivləşdirilir. Bu rejimdə istifadəçi süni zəkanın işlədiyi qovluğu tərk edə bilməz - əks halda sistem öz işini dayandıracaq. ChatGPT Agent artıq cümə axşamından etibarən Pro, Plus və Team abunəçiləri üçün əlçatandır. Onu aktivləşdirmək üçün alətlər menyusundan “agent rejimi”ni seçmək və ya /agent əmrini daxil etmək kifayətdir.