OpenAI-nin Sora tətbiqi 5 gündən az müddətdə 1 milyon dəfədən çox yüklənib
Proqram Təminatı
10.10.2025
Emil
OpenAI tərəfindən bir müddət əvvəl təqdim olunmuş video generasiya tətbiqi Sora 5 gündən az müddətdə 1 milyon dəfədən çox yüklənib. Bu barədə Sora komandasının rəhbəri Bill Peebles sosial şəbəkə X-dəki hesabında məlumat verib. O, qeyd edib ki, süni intellekt generatoru bu uğura OpenAI-nin məşhur süni intellekt botu ChatGPT-dən belə daha sürətlə çatıb. Hazırda ChatGPT-dən dünyada hər həftə 800 milyondan çox insan istifadə edir. Sora-nın nailiyyətini daha da təsirli edən məqam ondan ibarətdir ki, tətbiq yalnız Apple iOS əməliyyat sistemi ilə işləyən cihazlarda mövcuddur və onu yükləmək üçün xüsusi dəvət tələb olunur. Yəni Sora-nı yükləmək istəyən istifadəçi əvvəlcə xüsusi kod almalıdır.
Bu məhdudiyyətlərə baxmayaraq, süni intellekt generatoru Apple App Store mağazasında reytinq cədvəlində birinci yerə yüksəlib. “Komanda sürətli artım tempinə çatmaq üçün fədakarcasına çalışır” - deyə Peebles X sosial şəbəkəsindəki son paylaşımlarından birində yazıb. Sora tətbiqinin istifadəyə verilməsi ictimaiyyətdə geniş rezonans doğurub, xüsusilə də alqoritmin müəllif hüquqlarını poza biləcəyi barədə müzakirələrə səbəb olub. Platformada müəllif hüquqları ilə qorunan bir çox personajların - məsələn, “SpongeBob SquarePants”, “Rick and Morty” və “South Park” kimi cizgi filmlərinin qəhrəmanlarının yer aldıqları videolar tapmaq mümkündür. Üstəlik, istifadəçilər bu cür videoları özləri də generasiya edə bilirlər.
Televiziya, film və video sənayesinin maraqlarını təmsil edən Film Şirkətləri Assosiasiyası bəyan edib ki, assosiasiya üzvlərinə məxsus filmlərin, şouların və personajların hüquqlarını pozan videolar OpenAI platformasında geniş yayılıb. Assosiasiyanın baş direktoru Charles Rivkin bildirib ki, OpenAI bu problemi həll etmək üçün dərhal və qəti addımlar atmalıdır. O, əlavə edib ki, mövcud müəllif hüququ qanunvericiliyi müəlliflərin hüquqlarını qoruyur və bu vəziyyətə tam şəkildə şamil olunur. OpenAI-nin baş direktoru Sam Altman isə bildirib ki, şirkət yaxın zamanda müəllif hüquqlarının sahiblərinə bu hüquqlarla qorunan kontentin idarə olunması üçün daha çox imkan təqdim edəcək. Bu barədə o, ötən həftənin sonunda şirkətin bloqunda paylaşım edib.
Paylaş
