Stela adlı tərcümə qatı təqdim edildi: macOS 27 adi PC-də işləyə bilər

    Proqramçı Tyler Smith “Stela” adlı yeni tərcümə qatını yayımlayıb. Layihə Arm əsaslı “Apple Silicon” üçün hazırlanmış “macOS 27 sistemini x86-64 kompüterlərdə işə salmaq” üçündür. “Apple” 2020-ci ildən öz çiplərinə keçdiyinə görə adi kompüterlərə “macOS” quraşdırmaq xeyli çətinləşib. “Stela” kompüteri əməliyyat sisteminə virtual “M2 Mac mini” kimi göstərir.

    “Stela” “Linux” əsaslı UEFI tətbiqidir və USB yaddaşdan açılır. Quraşdırma üçün layihənin faylları, USB yaddaş və “macOS”un bir nüsxəsi lazımdır. Tərtibatçının sözlərinə görə, quraşdırma faylları dəyişdirilmir və proses əsl “Mac” kompüterindəki bərpa qaydasına uyğun gedir. İlk 0.1 versiyasından sonra yarım gün ərzində daha 3 buraxılış çıxıb.

    Tərcümə qatı Arm prosessorları üçün yazılmış əmrləri x86-64 kompüterlərin başa düşdüyü formaya çevirir. Kodun bir hissəsi əvvəlcədən hazırlanır, qalan hissəsi işlədiyi anda JIT üsulu ilə uyğunlaşdırılır. “Apple”ın “Metal” qrafik əmrləri də “Mesa” sisteminin anlaya bildiyi NIR təlimatlarına çevrilir. Tərtibatçı açıq şəkildə deyir ki, “Stela” hazırda yavaş işləyir və qeyri-sabitdir.

    Minimum tələblər x86-64-v2 səviyyəli prosessor, 8 GB RAM və UEFI dəstəyidir. Tərtibatçıya görə, layihə ən azı 2008-ci ilin “Intel Core” və ya 2011-ci ilin “AMD FX” prosessorunda işləyə bilər. Yaddaş qurğusunda GPT bölməsi və ya ayrıca disk olmalıdır. Qrafika üçün “Nvidia”nın 16xx seriyasından müasir 5000 seriyasına qədər videokartlar dəstəklənir. Prosessorda AVX2 və AVX-512 sürətləndirmə funksiyaları varsa, “Stela” onlardan da yararlanır.

    Layihə hələ Wi-Fi ilə işləmir, Bluetooth funksiyaları da məhduddur. Simli şəbəkə dəstəyi daha genişdir: “Intel”, “Realtek”, “Broadcom”, “Aquantia” və “Atheros” şəbəkə nəzarətçiləri işləyir. USB Ethernet adapterlərindən də yararlanmaq olur. Tərtibatçı gələcəkdə “Linux” nüvəsinin tanıdığı bütün avadanlıqları dəstəkləmək istəyir. “Discord” icmasında bəzi istifadəçilər sistemi açılmağa yaxınlaşan kompüterlərin fotolarını paylaşırlar. Bununla belə, “Stela” hələ gündəlik istifadə üçün hazır deyil.