Süni intellekt tətbiqləri sürətlə yayılmağa davam edirlər

     Sensor Tower analitik şirkətinin hesabatına görə, generativ süni intellekt tətbiqləri 2025-ci ilin ilk yarısında həm yüklənmə sayında, həm də tətbiqdaxili satış gəlirində əhəmiyyətli artım göstərib. Hesabatda qeyd olunur ki, artıq App Store və Google Play-də tətbiq təsvirlərində süni intellekt ifadəsi 100 000-dən çox hallarda istifadə olunur. ChatGPT istifadəçilər arasında məşhurluq baxımından lider mövqeyini qoruyur və demək olar ki, Google-a çatıb. Generativ süni intellekt tətbiqlərinin yüklənmə sayı 2024-cü ilin ikinci yarısında 1 milyard olduğu halda, 2025-ci ilin ilk yarısında 1.7 milyarda çatıb. Bu tətbiqlərdən əldə olunan satış gəliri 2024-cü ilin ikinci yarısında 932 milyon dollar olduğu halda, 2025-ci ilin ilk yarısında 1.87 milyard dollara yüksəlib.

     İstifadəçilər 2025-ci ilin ilk yarısında generativ süni intellekt tətbiqlərində 15.6 milyard saatdan çox vaxt keçiriblər ki, bu da 2024-cü ilin ikinci yarısındakı 8.5 milyard saatla müqayisədə demək olar ki, 2 dəfə çoxdur. Son 6 ayda süni intellektə müraciət sayı 426 milyarddan çox sessiya ilə qeydə alınıb.  Generativ süni intellekt üçün ən sürətlə böyüyən bazar Asiya bazarı olub - Hindistan və materik Çin kimi ölkələr sayəsində bazar payı 42.6%-ə çatıb. 2025-ci ilin ilk yarısında Asiyada generativ süni intellekt tətbiqlərinin yüklənməsi 80% artıb. Müqayisə üçün, bu göstərici Avropada 51%, Şimali Amerikada isə 39% olub. Latın Amerikasında generativ süni intellekt daxilində alışların sayında ən yüksək artım qeydə alınıb, lakin Şimali Amerika 40%-lik payla hələ də lider mövqeyini qoruyur. Sensor Tower-in məlumatına görə, ChatGPT tətbiqdaxili satış gəliri baxımından Çin istisna olmaqla bütün ölkələrdə lider olub.

     Bununla belə, Çində Deepseek tətbiqi istifadəyə verildikdən sonra bir neçə həftə ərzində yüklənmə sayına görə ən yüksək nəticəni göstərib. İstifadəçilər süni intellekt köməkçilərinə daha çox müraciət etməyə başlayıblar və bu kateqoriyada lider mövqe hələ də ChatGPT-yə məxsusdur. 2025-ci ilin ilk yarısında istifadəçilər ay ərzində orta hesabla 12 gündən çox ChatGPT-dən istifadə ediblər. Digər məşhur generativ süni intellekt tətbiqlərinə Character AI, PolyBuzz, DeepSeek və Perplexity daxildir. ChatGPT istifadəçilərinin sadiqliyi təsiredicidir. Onlar OpenAI tətbiqindən X (keçmiş Twitter) və Reddit kimi sosial şəbəkələr qədər tez-tez istifadə edirlər. Yalnız Google ayda orta istifadə günlərinin sayına görə daha yüksək göstəriciyə malikdir. Ötən illə müqayisədə ChatGPT-dən istirahət günlərində istifadə də artıb ki, bu da şəxsi sorğuların sayının çoxaldığını göstərir. Sensor Tower-in hesabatında vurğulanır ki, “ChatGPT tətbiqindən istifadə modelləri Google-a yaxınlaşır - insanlar bu alətdən həm iş, həm də qeyri-iş vaxtlarında əsas axtarış vasitəsi kimi istifadə edirlər”.

     ChatGPT ilə aparıcı axtarış sistemləri arasındakı fərq azalıb. 2025-ci ilin ilk yarısında ChatGPT-dən gündəlik orta istifadə müddəti 16 dəqiqə olub, bu göstərici aparıcı axtarış sistemləri və brauzerlər üçün isə 18.2 dəqiqə təşkil edib. Axtarışdan əlavə, istifadəçilər ChatGPT-yə sağlamlıq və rifah, alış-veriş, şəxsi maliyyə və yemək reseptləri ilə bağlı suallarla da müraciət edirlər. 2025-ci ilin ikinci rübündə ChatGPT-yə edilən sorğuların 1/3-dən çoxu həyat tərzi və əyləncə mövzularında olub. Sensor Tower qeyd edir ki, ChatGPT həm mobil tətbiqlərdə, həm də platformalarda məşhurluğunu artırır. ABŞ-da ChatGPT istifadəçilərinin 15%-dən çoxu həm veb versiyanı, həm də mobil cihazlardakı tətbiqi istifadə edir. Bu göstərici Temu və Threads kimi digər platformaların göstəricilərindən yüksəkdir. Bütün bu irəliləyişlərə baxmayaraq, ChatGPT hələ də Google, Facebook, YouTube, Google Docs və Amazon-dan geri qalır.

     Bu platformalarda istifadəçilərin 25%-dən çoxu xidmətdən həm internetdə, həm də mobil cihazlarda istifadə edir. Analitik şirkətin hesabatına görə, süni intellekt termini artıq həm App Store, həm də Play Store-da tətbiq təsvirlərində 100 000-dən çox dəfə qeyd olunur. 2025-ci ilin ilk yarısında istifadəçilər süni intellektlə əlaqəli 7.5 milyard tətbiq yükləyiblər ki, bu da ümumi yükləmələrin təxminən 10%-ni təşkil edir. Sensor Tower süni intellekt boom-u fonunda bəzi spekulyasiya cəhdlərini də vurğulayıb - müxtəlif kateqoriyalarda məşhur tətbiqlərin adlarında süni intellekt termininə getdikcə daha çox rast gəlinir. Son 12 ayda “Kontent yaradılması”, “Foto redaktəsi”, “Qidalanma və dieta”, “İmtahana hazırlıq”, “Repetitorluq və təhsil”, “Tərcümə” və “Hobbi və maraqlar üzrə digər xidmətlər” kimi kateqoriyalardakı bir çox tətbiqlərin adlarına süni intellektlə bağlı terminlər əlavə edilib. Lakin Sensor Tower analitiklərinin fikrincə, bu tendensiya yalnız qısamüddətli yüklənmə artımı ilə nəticələnib.