Süni zəka əsaslı şəkil generasiya modeli Google Imagen 4 hamı üçün istifadəyə verilib

     Google növbəti nəsil süni zəka əsaslı şəkil generasiya modeli olan Imagen 4-ü hamı üçün təqdim edib və onu indiyədək təqdim etdiyi ən yaxşı mətn-şəkil çevirmə modeli adlandırıb. Şirkət bildirib: “Imagen 4 əvvəlki modellərimizlə müqayisədə mətnin vizuallaşdırılmasını əhəmiyyətli dərəcədə yaxşılaşdırır və mətn əsasında şəkil generasiya keyfiyyətinin sərhədlərini genişləndirir”. Imagen 4 hazırda Gemini API vasitəsilə ödənişli əsasla öncədən baxış versiyası şəklində, həmçinin Google AI Studio-da məhdud sayda pulsuz test üçün əlçatandır. Hal-hazırda Imagen 4 ailəsi iki modeldən ibarətdir: Imagen 4 və Imagen 4 Ultra.

     Imagen 4 modeli geniş çeşidli şəkil generasiya tapşırıqlarını yerinə yetirmək üçün hazırlanıb və xüsusilə mətnlə işləmək baxımından Imagen 3-lə müqayisədə keyfiyyət baxımından əhəmiyyətli irəliləyiş təqdim edir. Imagen 4-dən istifadə haqqı hər yaradılmış şəkil üçün 0.04$ təşkil edir. Flaqman model olan Imagen 4 Ultra istifadəçinin mətn göstərişlərinə maksimum dəqiqliklə uyğun gələn təsvirlər yaratmaq üçün nəzərdə tutulub ki, bu da digər aparıcı generativ modellərlə müqayisədə daha yüksək nəticələr əldə etməyə imkan verir. Imagen 4 Ultra ilə yaradılmış bir şəkilin dəyəri 0.06$-dır. Imagen 4 modelləri ilə yaradılan bütün şəkillər SynthID adlı görünməz rəqəmsal su nişanı ilə işarələnir.