Təqdimata hazırlaşan növbəti Apple macOS-un necə adlanacağı məlum olub

     Apple şirkətinin bir neçə böyük elan edəcəyi və əməliyyat sistemlərinin yeni versiyalarını təqdim edəcəyi WWDC 2025 konfransı yaxınlaşır. Artıq məlumdur ki, macOS-un növbəti versiyası 19 deyil, 26 nömrəsini alacaq və indi onun adı da bəlli olub. Bloomberg-in nüfuzlu insayderi Mark Gurman, Power On adlı həftəlik xəbər bülleteninin yeni buraxılışında bildirib ki, macOS 26 əməliyyat sistemi Tahoe adını daşıyacaq. Bu ad Kaliforniyada yerləşən və kristal kimi təmiz suları ilə məşhur olan eyniadlı gölə istinad edir. Beləliklə, Apple Kaliforniyanın coğrafi obyektlərinin adlarını macOS versiyalarına vermək ənənəsini davam etdirir. Xatırladaq ki, daha əvvəl macOS X Mavericks (2013), Yosemite, Monterey, Sequoia və digərləri təqdim edilmişdi. Bu ad, tərtibatçıların daha şəffaf interfeys estetikası - yığcam pəncərələr, düymələr və ikonlar - yaratmaq istəklərini əks etdirməlidir. WWDC 2025 konfransı 9-13 iyun tarixlərində keçiriləcək.