“VLC” bütün platformalarda 7 milyard yüklənməni keçdi

    Qeyri-kommersiya təşkilatı “VideoLAN” tərəfindən hazırlanan pulsuz və oflayn “VLC” media pleyeri bütün platformalar üzrə 7 milyard yüklənmə həddini keçib. Bahalı yayım platformalarının geniş yayıldığı dövrdə bu nəticə ödənişsiz proqram üçün mühüm göstərici sayılır. Media pleyeri internet bağlantısı olmadan da işləyir və istifadəyə görə abunə haqqı tələb etmir.

    “VLC” 6 milyard yüklənmə həddini 2025-ci ilin yanvarında keçmişdi. Yeni göstəriciyə həmin tarixdən təxminən 18 ay sonra çatılıb və bu müddətdə yüklənmələrin sayı daha 1 milyard artıb. “VideoLAN” təşkilatının prezidenti və “VLC”nin aparıcı tərtibatçısı Jean-Baptiste Kempf 7 milyardlıq nəticəni elektron məktub vasitəsilə açıqlayıb.

    “VideoLAN” bu yaxınlarda proqramı televizorlar üçün hazırlanmış “Amazon” şirkətinin yeni “Vega OS” əməliyyat sisteminə uyğunlaşdırıb. Təşkilat “VLC” üçün digər platformalarda işləmək imkanını da genişləndirməyi planlaşdırır. Həmçinin müxtəlif kodeklərin dəstəklənməsi üzərində iş gedir və məqsəd proqramı mümkün qədər çox sistemlə uyğunlaşdırmaqdır.

    Komanda eyni zamanda media pleyerinin yeni versiyası olan “VLC 4” üzərində işləyir. Hazırlıq prosesi vaxt aparır və yeni versiyanın nə zaman istifadəyə veriləcəyi açıqlanmayıb. “VideoLAN” ötən il lokal modellərdən yararlanan AI əsaslı tərcümə və subtitr imkanlarını nümayiş etdirmişdi, lakin həmin funksiyaların sonradan yayımlanması barədə dəqiq məlumat yoxdur.