Xiaomi HyperOS 3-ün qlobal versiyasını anons edib

     Xiaomi şirkəti Android 16 əsasında hazırlanan HyperOS 3 əməliyyat sisteminin stabil versiyasının qlobal miqyasda istifadəyə veriləcəyini təsdiqləyib. Yayım oktyabrda başlayacaq və onlarla smartfon və planşeti əhatə edəcək, həmçinin yeni sistemin xüsusi versiyası taxıla bilən cihazlar üçün də təqdim olunacaq. Yeniləmələrin tam dövrü 2026-cı ilin mart ayına qədər davam edəcək. Keçən ayın sonunda bu əməliyyat sistemi Çində nümayiş olunmuşdu və artıq Xiaomi 15 də daxil olmaqla 10-dan çox cihaz onun beta versiyasına çıxış əldə edib. Qlobal bazarda HyperOS 3-ün stabil versiyasının oktyabrda istifadəyə veriləcəyi bildirilib, lakin Xiaomi dəqiq tarixləri açıqlamayıb.

     İlk olaraq bu sistemi Xiaomi 15T və Xiaomi 15T Pro smartfonları, Watch S4 41 mm ağıllı saatı, Smart Band 10 Glimmer Edition ağıllı qolbağı, eləcə də Redmi Pad 2 Pro və Xiaomi Pad Mini planşetləri əldə edəcəklər. Bu cihazlar artıq əvvəlcədən quraşdırılmış HyperOS 3 ilə təqdim ediləcək. Həmçinin oktyabr və noyabr aylarında Xiaomi 15 və 15 Ultra flaqman smartfonları, qatlana bilən qapaqlı MIX Flip modeli, Redmi Note 14 seriyası smartfonları, POCO F7 və POCO X7, eləcə də Smart Band 10 ağıllı qolbağı HyperOS 3 yeniləməsini əldə edəcəklər. Noyabr-dekabr ayları ərzində isə ötən ilki flaqmanlar - Xiaomi 14 və 14T seriyaları, həmçinin müxtəlif REDMI və POCO modelləri üçün yeniləmə təqdim olunacaq. Daha köhnə smartfon və planşetlərin, o cümlədən Xiaomi 12 və 13 istifadəçiləri isə mart ayına qədər gözləməli olacaqlar. Ümumilikdə Xiaomi 50-dən çox smartfon modelini və onlarla yanaşı bir neçə planşeti HyperOS 3-ə yeniləyəcək.